സംസ്ഥാനത്ത് ഇന്നും കനത്ത മഴയ്ക്ക് സാധ്യത.തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി, എറണാകുളം, കോഴിക്കോട്, വയനാട് എന്നീ 8 ജില്ലകളിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്.
മറ്റ് ജില്ലകളിൽ ഇന്ന് യെല്ലോ അലർട്ട് ആണ്.ബംഗാൾ ഉൾക്കടലിലെ ന്യൂനമർദ്ദം കന്യാകുമാരി തീരത്തോട് കൂടുതൽ അടുക്കുന്നതിനാൽ ഇന്നും നാളെയും ഒറ്റപ്പെട്ട ശക്തമായ മഴയ്ക്ക് സാധ്യതയുണ്ടെന്നാണ് കാലാവസ്ഥ നിരീക്ഷണ കേന്ദ്രത്തിന്റെ അറിയിപ്പ്.
ഇടിമിന്നലും ശക്തമായ കാറ്റും തുടരും.മലയോര മേഖലകളിൽ ജാഗ്രതാ നിർദേശം നൽകിയിട്ടുണ്ട്.മത്സ്യബന്ധനത്തിന് വിലക്കേർപ്പെടുത്തിയിട്ടുണ്ട്.
അതേസമയം, ഇടുക്കിയിൽ മുല്ലപ്പെരിയാർ ഡാമിന്റെ പ്രദേശത്ത് ഇന്നലെ മുതൽ ശക്തമായ മഴ തുടരുകയാണ്.ഇതോടെ അണക്കെട്ടിലെ രണ്ട്,മൂന്ന്,നാല് സ്പിൽവേ ഷട്ടറുകൾ 65 സെൻറീമീറ്റർ വീതമാണ് ഉയർത്തിയത്.കഴിഞ്ഞദിവസം തുറന്ന ആറ് ഷട്ടറുകളിൽ 5 എണ്ണം ഇന്നലെ അടച്ചിരുന്നു.
നിലവിൽ 1493 ക്യുസെക്‌സ് ജലമാണ് അണക്കെട്ടിൽ നിന്ന് ഒഴുക്കി വിടുന്നത്.138.85 അടിയാണ് ഇപ്പോഴത്തെ ജലനിരപ്പ്.
Story highlight : Chance of heavy rain in the state today,Orange alert in 8 District.
