കൊച്ചി സൈബർ പോലീസ് ഒരു യുവാവിനെ അറസ്റ്റ് ചെയ്തു. പാലക്കാട് അഗളി സ്വദേശിയായ ശ്രീജിത്ത് രവീന്ദ്രനാണ് പിടിയിലായത്. സോഷ്യൽ മീഡിയയിലൂടെ ഒരു യുവനടിയെ അപമാനിച്ചെന്ന പരാതിയിലാണ് നടപടി. യുവനടി കൊച്ചി സിറ്റി പോലീസ് കമ്മീഷണർക്ക് നൽകിയ പരാതിയെ തുടർന്ന് സൈബർ പൊലീസ് അന്വേഷണം നടത്തി പ്രതിയെ പിടികൂടുകയായിരുന്നു.
നടിയ്ക്കെതിരെ സാമൂഹ്യ മാധ്യമത്തിലൂടെ അശ്ലീല കമന്റുകൾ പോസ്റ്റ് ചെയ്തതായി കണ്ടെത്തിയിരുന്നു. സിനിമയിൽ തിരക്കഥാകൃത്താണെന്ന് സ്വയം അവകാശപ്പെട്ടിരുന്ന ഇയാൾ, പ്രമുഖ സിനിമാ നടിമാരുടെ ഫോട്ടോകൾ പ്രൊഫൈൽ പിക്ചറുകളായി ഉപയോഗിച്ച് ഫെയ്സ്ബുക്കിൽ വ്യാജ അക്കൗണ്ടുകൾ നിർമ്മിച്ച് ചാറ്റ് ചെയ്തിരുന്നതായും കണ്ടെത്തി. നടിമാരെന്ന വ്യാജേന ചാറ്റ് ചെയ്യുന്നതിനിടെ വീഡിയോ കോളിൽ സംസാരിക്കാൻ അവസരമൊരുക്കാമെന്ന് പറഞ്ഞ് പലരിൽ നിന്നും പണം വാങ്ങിയതായും പൊലീസ് കണ്ടെത്തി.
സോഷ്യൽ മീഡിയ വഴി വീഡിയോകളും മറ്റും പോസ്റ്റ് ചെയ്ത് പൊതുജനങ്ങൾക്കിടയിൽ കലഹമുണ്ടാക്കിയതിന് അഗളി സ്റ്റേഷനിലും കോങ്ങാട് സ്റ്റേഷനിലും ഇയാൾക്കെതിരെ കേസുകൾ നിലവിലുണ്ടെന്നും പൊലീസ് അറിയിച്ചു. പണം തട്ടിയതുമായി ബന്ധപ്പെട്ട് കൂടുതൽ അന്വേഷണം നടക്കുന്നതായും പൊലീസ് വ്യക്തമാക്കി.
Story Highlights: Kochi cyber police arrest youth for defaming actress on social media and creating fake profiles
