തൃശൂരിലെ സ്വകാര്യ ധനകാര്യ സ്ഥാപനത്തിൽ നിന്ന് 20 കോടി രൂപ തട്ടിയെടുത്ത് മുങ്ങിയ യുവതിക്കായി ലുക്ക് ഔട്ട് നോട്ടീസ് പുറപ്പെടുവിക്കാൻ അധികൃതർ തീരുമാനിച്ചു. കൊല്ലം സ്വദേശിയായ ധന്യാ മോഹൻ എന്ന ജീവനക്കാരിയാണ് ഈ വൻ തട്ടിപ്പിന് പിന്നിൽ. പ്രത്യേക അന്വേഷണ സംഘത്തിനാണ് കേസിന്റെ ചുമതല.
18 വർഷത്തെ സേവനത്തിനുശേഷമാണ് ധന്യ ഈ തട്ടിപ്പ് നടത്തിയത്. 2019 മുതൽ വ്യാജ ലോണുകൾ സൃഷ്ടിച്ച് കമ്പനിയുടെ ഡിജിറ്റൽ പേഴ്സണൽ ലോൺ അക്കൗണ്ടിൽ നിന്ന് പണം തന്റെ അച്ഛന്റെയും സഹോദരന്റെയും വിവിധ അക്കൗണ്ടുകളിലേക്ക് കൈമാറ്റം ചെയ്യുകയായിരുന്നു. ഈ പണം ഉപയോഗിച്ച് ആഡംബര വസ്തുക്കൾ, സ്ഥലം, വീട് എന്നിവ വാങ്ങിയതായി കണ്ടെത്തിയിട്ടുണ്ട്.
പിടിയിലാകുമെന്ന് മനസ്സിലായപ്പോൾ ശാരീരിക അസ്വസ്ഥത നടിച്ച് ഓഫീസിൽ നിന്ന് ഇറങ്ങിപ്പോയ ധന്യ, ആരുടെയോ സഹായത്തോടെ രക്ഷപ്പെട്ടതായാണ് വിവരം. വലപ്പാട് പോലീസ് കേസ് രജിസ്റ്റർ ചെയ്ത് അന്വേഷണം ഊർജിതമാക്കിയിട്ടുണ്ട്. പ്രതിയെ കണ്ടെത്താനുള്ള ശ്രമങ്ങൾ തുടരുകയാണ്.
