തിരുവനന്തപുരം കഴക്കൂട്ടത്ത് കാണാതായ 13 വയസുകാരിക്കായി വ്യാപക തിരച്ചിൽ നടക്കുന്നു. അതിഥി തൊഴിലാളിയായ അസാം സ്വദേശി അൻവർ ഹുസൈന്റെ മകൾ തസ്മിത്ത് തംസിനെയാണ് ഇന്ന് രാവിലെ മുതൽ കാണാതായത്. കണിയാപുരം സ്കൂളിലെ ആറാം ക്ലാസ് വിദ്യാർത്ഥിനിയായ തസ്മീൻ, സഹോദരിമാരുമായി വഴക്കിട്ടതിന് അമ്മ ശകാരിച്ചതിന് പിന്നാലെയാണ് വീട്ടിൽ നിന്ന് ഇറങ്ങിപ്പോയത്. ബാഗിൽ വസ്ത്രങ്ങൾ പായ്ക്ക് ചെയ്ത ശേഷമാണ് പെൺകുട്ടി വീട് വിട്ടത്.
അസാമിലേക്ക് പോയെന്ന സംശയത്തിൽ റെയിൽവേ സ്റ്റേഷനുകളിലും ട്രെയിനുകളിലും പൊലീസ് പരിശോധന ആരംഭിച്ചു. പാലക്കാട് നിന്ന് ട്രെയിനിൽ പെൺകുട്ടിയെ കണ്ടെത്തി എന്ന വിവരത്തിൽ പൊലീസ് പാലക്കാട് റെയിൽവേ സ്റ്റേഷനിൽ അരോണയ് എക്സ്പ്രസിൽ പരിശോധന നടത്തിയെങ്കിലും പെൺകുട്ടിയെ കണ്ടെത്താനായില്ല. 14 മണിക്കൂറായി പെൺകുട്ടിയെ കാണാതായിട്ട്.
തിരുവനന്തപുരം ഭാഗത്തേക്ക് പോകുന്ന സിസിടിവി ദൃശ്യങ്ങൾ പുറത്തുവന്നതിനെ തുടർന്ന്, കൂടുതൽ സിസിടിവി ദൃശ്യങ്ങൾ കേന്ദ്രീകരിച്ചാണ് പൊലീസ് പരിശോധന പുരോഗമിക്കുന്നത്. തിരുവനന്തപുരം കേന്ദ്രീകരിച്ച് അന്വേഷണം ആരംഭിച്ചിട്ടുണ്ട്. പെൺകുട്ടിയെക്കുറിച്ച് വിവരം ലഭിക്കുന്നവർ 9497960113 എന്ന നമ്പറിൽ ബന്ധപ്പെടാൻ പൊലീസ് അഭ്യർത്ഥിച്ചിട്ടുണ്ട്.
Story Highlights: Widespread search for missing 13-year-old girl in Thiruvananthapuram
