Tribal Youth Dragged: Two Arrested, Two Absconding in Wayanad

വയനാട് മാനന്തവാടിയിൽ നടന്ന ഞെട്ടിക്കുന്ന സംഭവത്തിൽ രണ്ട് പ്രതികൾ പിടിയിലായി. ആദിവാസി യുവാവിനെ റോഡിലൂടെ വലിച്ചിഴച്ച കേസിൽ പച്ചിലക്കാട് സ്വദേശികളായ മുഹമ്മദ് ഹർഷിദും അഭിരാമും ആണ് അറസ്റ്റിലായത്. കൽപ്പറ്റയിൽ നിന്നാണ് ഇവരെ പിടികൂടിയത്. എന്നാൽ, പനമരം സ്വദേശികളായ വിഷ്ണുവും നബീലും ഇപ്പോഴും ഒളിവിലാണ്. ഇവരെ പിടികൂടാനുള്ള അന്വേഷണം തുടരുകയാണ്.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

ഈ സംഭവത്തിൽ പരിക്കേറ്റ് ആശുപത്രിയിൽ കഴിയുന്ന മാതനെ മന്ത്രി ഒ.ആർ. കേളു സന്ദർശിച്ചു. സംഭവത്തിൽ കർശന നടപടി സ്വീകരിക്കുമെന്ന് മന്ത്രി ഉറപ്പ് നൽകി. പ്രതികളെ വേഗത്തിൽ കസ്റ്റഡിയിലെടുക്കാൻ നിർദ്ദേശം നൽകിയിട്ടുണ്ടെന്നും അദ്ദേഹം വ്യക്തമാക്കി. ആദിവാസി സമൂഹത്തോടുള്ള സമീപനത്തെ ചൂണ്ടിക്കാട്ടുന്ന ഗുരുതരമായ സംഭവമാണിതെന്ന് മന്ത്രി അഭിപ്രായപ്പെട്ടു.

മാനന്തവാടി കൂടൽ കടവിലാണ് ഈ ക്രൂരത അരങ്ങേറിയത്. വിനോദ സഞ്ചാരികളാണ് കാറിൽ കൈ ചേർത്ത് പിടിച്ച് അര കിലോമീറ്ററോളം മാതനെ വലിച്ചിഴച്ചത്. കൈയ്ക്കും കാലിനും ശരീരത്തിന്റെ പിൻഭാഗത്തും ഗുരുതരമായി പരിക്കേറ്റ മാതനെ മാനന്തവാടി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിരിക്കുകയാണ്. വധശ്രമത്തിനാണ് പൊലീസ് കേസെടുത്തിരിക്കുന്നത്. പ്രതികൾ ലഹരി ഉപയോഗിച്ചിരുന്നതായി സംശയിക്കുന്നതായി മാതൻ വെളിപ്പെടുത്തി. കൂടൽകടവ് പ്രദേശത്ത് ലഹരി ഉപയോഗം വ്യാപകമാണെന്നും അദ്ദേഹം പറഞ്ഞു.