Veteran Actor Madhu Reunites with Former Leading Ladies

മലയാള സിനിമയുടെ ഇതിഹാസ നടൻ മധുവിനെ കാണാൻ പഴയകാല നായികമാർ എത്തിയത് ചലച്ചിത്രമേളയുടെ തിരക്കുകൾക്കിടയിലാണ്. നവതി പിന്നിട്ട മധുവിനെ സന്ദർശിക്കാൻ തിരുവനന്തപുരം കണ്ണൻമൂലയിലെ വീട്ടിലെത്തിയത് കെആർ വിജയ, റോജ രമണി, ഉഷാ കുമാരി, രാജശ്രീ, ഹേമ ചൗധരി, റീന, ഭവാനി എന്നീ മുൻ സൂപ്പർ നായികമാരാണ്.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

പഴയകാല ഓർമകളും അനുഭവങ്ങളും പങ്കുവച്ച് നായികമാർ മധുവിന് ചുറ്റും ഒത്തുകൂടി. ഒരാൾ സംസാരിച്ചു തീരുമ്പോൾ അടുത്തയാൾ തുടങ്ങും വിധം അവരുടെ ഓർമ പുതുക്കൽ നീണ്ടുനിന്നു. വർത്തമാനങ്ങളും ചിരികളുമായി ഒരുപാട് സമയം ചെലവഴിച്ച അവരുടെ മധുര ഓർമകളും കഥകളും കൊണ്ട് സ്വീകരണമുറി നിറഞ്ഞു.

ആദരവിന്റെ പൊന്നാടയും സ്നേഹത്തിന്റെ പൂക്കളും നൽകി നായികമാർ മധുവിനെ ആദരിച്ചു. തന്നെ കാണാനെത്തിയ നായികമാരെ സന്ദർശിച്ചതിൽ വളരെയധികം സന്തോഷമുണ്ടെന്ന് മധു മാധ്യമങ്ങളോട് പ്രതികരിച്ചു. മധുവിനൊപ്പമാണ് തന്റെ ആദ്യ സിനിമ ചെയ്തതെന്നും പിന്നീട് ഒരുപാട് സിനിമകൾ അദ്ദേഹത്തോടൊപ്പം ചെയ്യാനുള്ള ഭാഗ്യം ലഭിച്ചെന്നും നടി കെ ആർ വിജയ പറഞ്ഞു.

‘കളങ്കാവൽ’ ധീരമായ പരീക്ഷണം; മമ്മൂട്ടിയെ പ്രശംസിച്ച് മന്ത്രി വി. ശിവൻകുട്ടി

ചോദ്യങ്ങൾക്കെല്ലാം മധു തനത് ശൈലിയിൽ മറുപടി നൽകി. കഥാപാത്രങ്ങൾക്ക് മാത്രമല്ല, ഓർമകൾക്കും പ്രായമാവില്ലെന്ന ഓർമപ്പെടുത്തൽ ബാക്കിയാക്കി പ്രിയ നടനെ കണ്ട് അവർ മടങ്ങി. ഈ സന്ദർശനം മലയാള സിനിമയുടെ സുവർണകാലത്തെ ഓർമിപ്പിക്കുന്നതും, തലമുറകൾ തമ്മിലുള്ള ബന്ധത്തിന്റെ മാധുര്യം വെളിവാക്കുന്നതുമായിരുന്നു.

Story Highlights: Veteran Malayalam actor Madhu reunites with former leading ladies during film festival

അമരം വീണ്ടും കാണാൻ തോന്നിയെന്ന് മധു, ഓർമ്മകൾ പങ്കിട്ട് മമ്മൂട്ടിയും