ബിജെപി സംസ്ഥാന അധ്യക്ഷ പദവിയിലേക്ക് തിരിച്ചുവരില്ലെന്ന് വി മുരളീധരൻ വ്യക്തമാക്കി. 15 വർഷം മുമ്പ് താൻ ആ സ്ഥാനം ഒഴിഞ്ഞതാണെന്നും, പാർട്ടി തനിക്ക് മറ്റ് ധാരാളം ചുമതലകൾ നൽകിയിട്ടുണ്ടെന്നും അദ്ദേഹം പറഞ്ഞു. എന്നാൽ, ഉപതെരഞ്ഞെടുപ്പ് തോൽവിയുമായി ബന്ധപ്പെട്ട ചോദ്യങ്ങൾക്ക് മുരളീധരൻ കൃത്യമായ മറുപടി നൽകിയില്ല. മറുപടി പറയേണ്ടത് സംസ്ഥാന അധ്യക്ഷനാണെന്നും, പാർട്ടി വേദിയിൽ പറയേണ്ട കാര്യങ്ങൾ അവിടെ പറയുമെന്നും അദ്ദേഹം വ്യക്തമാക്കി.
അതേസമയം, പാലക്കാട് ഉപതെരഞ്ഞെടുപ്പിലെ ബിജെപിയുടെ തോൽവിയിൽ ധാർമ്മിക ഉത്തരവാദിത്വം തനിക്കാണെന്ന് സംസ്ഥാന അധ്യക്ഷൻ കെ സുരേന്ദ്രൻ സമ്മതിച്ചു. പരാജയത്തിന്റെ ഉത്തരവാദിത്തം ഏറ്റെടുക്കാൻ വിധിക്കപ്പെട്ടയാളാണ് താനെന്നും, അതിൽ ഒരു പരാതിയും ഇല്ലെന്നും അദ്ദേഹം പറഞ്ഞു. ഒരു ടീമിനെ നയിക്കുമ്പോൾ വിജയവും പരാജയവും സമചിത്തതയോടെ നേരിടുക എന്നതാണ് വഴിയെന്നും സുരേന്ദ്രൻ കൂട്ടിച്ചേർത്തു.
കുറെ ആളുകൾ സ്തുതിക്കുമ്പോൾ പൊങ്ങാനും നിന്ദിക്കുമ്പോൾ താഴാനും ഉള്ളതല്ല തങ്ങളുടെ നിലപാടെന്ന് കെ സുരേന്ദ്രൻ മാധ്യമങ്ങളോട് വ്യക്തമാക്കി. സംസ്ഥാന അധ്യക്ഷനെന്ന നിലയിൽ പരാജയത്തിന്റെ ഉത്തരവാദിത്തം ഏറ്റെടുക്കുന്നതിൽ തനിക്ക് യാതൊരു മടിയുമില്ലെന്നും അദ്ദേഹം പറഞ്ഞു. ഇതിനിടെ, നിക്കണോ പോണോ എന്നത് കേന്ദ്ര നേതൃത്വം തീരുമാനിക്കുമെന്നും സുരേന്ദ്രൻ വ്യക്തമാക്കി.
Story Highlights: V Muraleedharan declines return to BJP state presidency, K Surendran takes responsibility for by-election defeat
