ഉത്തർപ്രദേശിലെ ബണ്ടയിൽ വിവാഹ മണ്ഡപത്തിൽ നടന്ന അസാധാരണ സംഭവം വലിയ ചർച്ചയായിരിക്കുകയാണ്. 18 വയസ്സുകാരിയായ അഞ്ജലി എന്ന വധു, തന്റെ വരനായ 25 വയസ്സുകാരൻ ദിലീപിനെതിരെ പൊലീസിൽ പരാതി നൽകി. മദ്യപിച്ചെത്തിയ വരൻ തന്റെ മാതാപിതാക്കളെ മർദ്ദിച്ചെന്നായിരുന്നു പരാതി.
വിവാഹചടങ്ങ് നടക്കുന്നതിനിടെയാണ് മദ്യലഹരിയിലായിരുന്ന ദിലീപ് അഞ്ജലിയുടെ മാതാപിതാക്കളായ സന്തോഷിനെയും മനീഷയേയും ആക്രമിച്ചത്. ഇതോടെ ഇരുവിഭാഗവും തമ്മിൽ സംഘർഷമുണ്ടാവുകയും വിവാഹം അലങ്കോലമാവുകയും ചെയ്തു. വധു തന്നെയാണ് പൊലീസിനെ വിളിച്ചുവരുത്തിയത്. സ്ഥലത്തെത്തിയ പൊലീസ് വരൻ ദിലീപിനെയും അദ്ദേഹത്തിന്റെ കുടുംബാംഗങ്ങളെയും സ്റ്റേഷനിലേക്ക് കൊണ്ടുപോയി.
എന്നാൽ പിന്നീട് ഇരുകൂട്ടരും തമ്മിൽ നടത്തിയ ചർച്ചയിൽ പ്രശ്നം പരിഹരിക്കാൻ തീരുമാനിച്ചു. വിവാഹം മുന്നോട്ട് കൊണ്ടുപോകാമെന്ന് ധാരണയായി. തുടർന്ന് വിദ്യാവാസിനി ക്ഷേത്രത്തിൽ വച്ച് വധൂവരന്മാർ വിവാഹിതരായി. വധു പരാതി പിൻവലിച്ചതായി ഗിർവാൻ സ്റ്റേഷൻ എസ്എച്ച്ഒ രാകേഷ് കുമാർ തിവാരി അറിയിച്ചു.
