UAE National Day: Free Parking in Sharjah, December Fuel Prices

യുഎഇ ദേശീയദിനത്തോടനുബന്ധിച്ച് ഷാർജയിൽ സൗജന്യ പാർക്കിങ് സൗകര്യം പ്രഖ്യാപിച്ചിരിക്കുകയാണ്. തിങ്കൾ, ചൊവ്വ ദിവസങ്ങളിൽ നടപ്പിലാക്കുന്ന ഈ പദ്ധതി പ്രകാരം, നീല വിവര ചിഹ്നങ്ങളാൽ അടയാളപ്പെടുത്തിയ ഏഴു ദിവസത്തെ പണമടച്ചുള്ള പാർക്കിങ് സോണുകൾ ഒഴികെയുള്ള എല്ലാ പൊതു പാർക്കിങ്ങുകളും സൗജന്യമായിരിക്കുമെന്ന് അധികൃതർ വ്യക്തമാക്കി. ഇതിനു മുമ്പ് ദുബായിലും സമാനമായ സൗജന്യ പാർക്കിങ് പദ്ധതി പ്രഖ്യാപിച്ചിരുന്നു.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

അതേസമയം, യുഎഇയിലെ ഡിസംബർ മാസത്തെ ഇന്ധനവില പ്രഖ്യാപിച്ചിരിക്കുകയാണ്. കഴിഞ്ഞ മാസത്തെ അപേക്ഷിച്ച് എല്ലാത്തരം പെട്രോളിനും വില കുറഞ്ഞപ്പോൾ, ഡീസലിന് നേരിയ വർധനവ് രേഖപ്പെടുത്തി. ദേശീയ ഇന്ധനസമിതിയുടെ അറിയിപ്പ് പ്രകാരം, അടുത്ത മാസം സൂപ്പർ പെട്രോളിന്റെയും സ്പെഷ്യൽ പെട്രോളിന്റെയും വിലയിൽ 13 ഫിൽസിന്റെ കുറവും, ഇ-പ്ലസിന് 12 ഫിൽസിന്റെ കുറവുമാണ് ഉണ്ടാവുക.

പുതിയ നിരക്കനുസരിച്ച്, സൂപ്പർ പെട്രോളിന് 2 ദിർഹം 61 ഫിൽസും, സ്പെഷ്യൽ പെട്രോളിന് 2 ദിർഹം 50 ഫിൽസുമാണ്. ഇ-പ്ലസിന്റെ വില 2 ദിർഹം 55 ഫിൽസിൽ നിന്ന് 2 ദിർഹം 43 ഫിൽസായി കുറഞ്ഞു. എന്നാൽ ഡീസലിന്റെ വില 2 ദിർഹം 67 ഫിൽസിൽ നിന്ന് 2 ദിർഹം 68 ഫിൽസായി നേരിയ തോതിൽ വർധിച്ചു. ഈ പുതിയ നിരക്കുകൾ ഇന്ന് അർധരാത്രി മുതൽ നിലവിൽ വരും. രാജ്യാന്തര തലത്തിലെ എണ്ണവില ദൈനംദിനം വിശകലനം ചെയ്ത ശേഷമാണ് ഇന്ധനസമിതി യോഗം ചേർന്ന് യുഎഇയിലെ പ്രതിമാസ ഇന്ധനവില നിശ്ചയിക്കുന്നത്.