മലയാളത്തിന്‍റെ സ്വന്തം മഞ്ജു വാര്യര്‍ക്ക് ഇന്ന് നാല്‍പത്തിമൂന്നാം പിറന്നാൾ. 1995ല്‍ മോഹന്‍ സംവിധാനം ചെയ്ത സാക്ഷ്യം എന്ന ചിത്രത്തിലൂടെ മലയാള സിനിമയിലേക്ക് ചുവടുവച്ച കലാപ്രതിഭ മലയാളി പ്രേക്ഷകരെ ഇന്നും വിസ്മപ്പെടുത്തുന്നു.
മഞ്ജു വാര്യര്‍ എന്ന താരത്തിന്റെ തുടക്കം കലോത്സവവേദികളില്‍ നിന്നുമായിരുന്നു.സംസ്ഥാന കലോത്സവത്തില്‍ തുടർച്ചയായി രണ്ട് വര്‍ഷം കലാതിലകമായിരുന്നു മഞ്ജു വാര്യര്‍. തന്റെ ആദ്യചിത്രം സാക്ഷ്യമാണെങ്കിലും മഞ്ജു നായികയാവുന്നത് 1996ല്‍ പുറത്തിറങ്ങിയ സല്ലാപത്തിലൂടെയാണ്. പിന്നീടങ്ങോട്ട് മികച്ച കഥാപാത്രങ്ങളിലൂടെ മലയാള സിനിമയിൽ ഇടം പിടിക്കാൻ മഞ്ചു എന്ന അതുല്യ പ്രതിഭയ്ക്കു കഴിഞ്ഞു.
കമലിന്‍റെ ഈ പുഴയും കടന്ന് എന്ന ചിത്രത്തിലൂടെ ആദ്യ സംസ്ഥാന ചലച്ചിത്ര പുരസ്കാരത്തിന് മഞ്ജു അർഹയായി. ടികെ രാജീവ് കുമാറിന്‍റെ കണ്ണെഴുതി പൊട്ടുംതൊട്ട് എന്ന ചിത്രത്തിലൂടെ ദേശീയ അവാർഡ് ജൂറിയുടെ പ്രത്യേക പരാമര്‍ശവും മഞ്ജു നേടിയെടുത്തു.
പിന്നീട് സിനിമ ലോകവുമായുള്ള 15 വര്‍ഷത്തെ ഇടവേളയ്ക്ക് ശേഷം 2014ല്‍ റോഷന്‍ ആന്‍ഡ്രൂസിന്‍റെ ഹൌ ഓള്‍ഡ് ആര്‍ യു എന്ന ചിത്രത്തിലൂടെ മഞ്ജു ശക്തമായ തിരിച്ചുവരവ് നടത്തി.ഇപ്പോഴും മികച്ച കഥാപാത്രങ്ങളിലൂടെ മുന്നോട്ടുപോകുകയാണ് മഞ്ജുവിന്റെ സിനിമ ജീവിതം. മഞ്ജുവിന്റെ അവിസ്മരണീയ പ്രകടനങ്ങള്‍ക്കായി പ്രേക്ഷകർ ഇനിയും കാത്തിരിക്കയാണ്.
Story highlight : Today Manju Warrier’s 43rd birthday.
