Thrissur Police Warns of New Passport Application Scam

പാസ്പോര്ട്ടിനായി അപേക്ഷിച്ചവരെ ലക്ഷ്യമിട്ട് പുതിയ തരം തട്ടിപ്പ് നടക്കുന്നുവെന്ന് തൃശ്ശൂര് സിറ്റി പൊലീസ് മുന്നറിയിപ്പ് നല്കി. സാമൂഹിക മാധ്യമങ്ങളിലൂടെയാണ് പൊലീസ് ഈ ജാഗ്രതാ നിര്ദേശം പുറപ്പെടുവിച്ചത്. പലതരം വാഗ്ദാനങ്ങളുമായി എത്തുന്ന സന്ദേശങ്ങളും അവയിലെ ലിങ്കുകളും സൂക്ഷിച്ച് കൈകാര്യം ചെയ്യണമെന്നും, സേവനങ്ങള്ക്കായി ഔദ്യോഗിക സംവിധാനങ്ങളെ മാത്രം ആശ്രയിക്കുന്നതാണ് സുരക്ഷിതമെന്നും പൊലീസ് അറിയിച്ചു.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

വ്യാജ വെബ്സൈറ്റുകള് കണ്ടെത്തിയാല് സഞ്ചാര് സാഥി എന്ന സൈറ്റിലോ ബന്ധപ്പെട്ട ഉദ്യോഗസ്ഥരെയോ അറിയിക്കണമെന്ന് നിര്ദേശിച്ചിട്ടുണ്ട്. .gov.in എന്നതില് അവസാനിക്കാത്ത വെബ്സൈറ്റുകള് (www.passportindia.gov.in അല്ലാത്തവ) തട്ടിപ്പായിരിക്കാമെന്നും മുന്നറിയിപ്പില് പറയുന്നു. പാസ്പോര്ട്ടുമായി ബന്ധപ്പെട്ട എല്ലാ കാര്യങ്ങള്ക്കും നേരിട്ട് പാസ്പോര്ട്ട് ഓഫീസുമായി ബന്ധപ്പെടണമെന്നും നിര്ദേശിച്ചിട്ടുണ്ട്.

സൈബര് തട്ടിപ്പിന് ഇരയായി സാമ്പത്തിക നഷ്ടം സംഭവിച്ചാല് 1930 എന്ന നമ്പരില് ഉടനടി റിപ്പോര്ട്ട് ചെയ്യണമെന്നും പൊലീസ് നിര്ദേശിച്ചു. “ഈ ലിങ്കില് ക്ലിക്ക് ചെയ്താല് പാസ്പോര്ട്ട് പെട്ടെന്ന് വീട്ടിലെത്തും” എന്നതുപോലുള്ള വാഗ്ദാനങ്ങളുമായാണ് തട്ടിപ്പ് സന്ദേശങ്ങള് എത്തുന്നതെന്നും മുന്നറിയിപ്പില് പറയുന്നു. ഇത്തരം സന്ദേശങ്ങള് പൂര്ണമായും അവഗണിക്കണമെന്നും, പകരം ഔദ്യോഗിക പാസ്പോര്ട്ട് സേവാ വെബ്സൈറ്റോ ഔദ്യോഗിക മൊബൈല് ആപ്ലിക്കേഷനോ മാത്രം ഉപയോഗിക്കണമെന്നും നിര്ദേശിച്ചിട്ടുണ്ട്. പാസ്പോര്ട്ട് സേവനങ്ങള് നല്കുന്നുവെന്ന് അവകാശപ്പെടുന്ന അനൗദ്യോഗിക വെബ്സൈറ്റുകളില് പ്രവേശിക്കുകയോ അവയിലൂടെ ഫീസ് അടയ്ക്കുകയോ ചെയ്യരുതെന്നും പൊലീസ് മുന്നറിയിപ്പ് നല്കി.