തെക്കുകിഴക്കന്‍ ഏഷ്യയിലെ ആദ്യ രാജ്യമായി തായ്‌ലൻഡ് സ്വവർഗ വിവാഹം അംഗീകരിച്ചു. ചൊവ്വാഴ്ച റോയൽ ഗസറ്റിൽ പ്രസിദ്ധീകരിച്ച ബില്ല് അടുത്ത വർഷം ജനുവരി 22 മുതൽ പ്രാബല്യത്തിൽ വരും. ജൂണിൽ സെനറ്റിൻ്റെ അംഗീകാരം നേടിയ ബിൽ നിയമമാകാൻ രാജകീയ അംഗീകാരം കൂടി ആവശ്യമായിരുന്നു.
പുതിയ നിയമത്തില്‍ ലിംഗ നിക്ഷ്പക്ഷത കാണിക്കുന്ന പദങ്ങള്‍ ഉപയോഗിക്കുമെന്നും സ്വവര്‍ഗ ദമ്പതികള്‍ക്ക് ദത്തെടുക്കലും മറ്റവകാശങ്ങളും നല്‍കുമെന്നുമാണ് റിപ്പോർട്ടുകൾ. ഭര്‍ത്താവ്, ഭാര്യ, പുരുഷന്മാര്‍, സ്ത്രീകള്‍ എന്നിങ്ങനെയുള്ള പദങ്ങള്‍ക്ക് പകരമായിരിക്കും ഇത്. വർഷങ്ങളായുള്ള പോരാട്ടത്തിനാണ് ഫലം കണ്ടതെന്നും തീരുമാനം ചരിത്രപരമാണെന്നുമാണ് ആക്ടീവിസ്റ്റുകൾ വ്യക്തമാക്കുന്നത്.
മുന്‍ തായ്‌ലൻഡ് പ്രധാനമന്ത്രി ശ്രേത്ത തവിസിന് ബില്ലിനെ പിന്തുണച്ച് രംഗത്തെത്തി. തായ്‌ലന്റിന്റെ സുപ്രധാന ചുവടുവെപ്പുകളില്‍ ഒന്നാണിതെന്നും ലിംഗവൈവിധ്യം പൂര്‍ണമായി അംഗീകരിക്കപ്പെടുന്നുവെന്നും അദ്ദേഹം പറഞ്ഞു. ഇതോടെ തായ്‌ലൻഡ് തെക്കുകിഴക്കന്‍ ഏഷ്യയില്‍ സ്വവര്‍ഗ വിവാഹത്തെ അംഗീകരിക്കുന്ന ആദ്യ രാജ്യമായി മാറിയിരിക്കുകയാണ്.
Story Highlights: Thailand becomes first Southeast Asian country to legalize same-sex marriage
