സ്വർണക്കടത്ത് കേസ് പ്രതി സ്വപ്ന സുരേഷിന്റെ വ്യാജ ഡിഗ്രി സർട്ടിഫിക്കറ്റ് കേസിൽ പുതിയ വഴിത്തിരിവ്. രണ്ടാം പ്രതിയായ സച്ചിൻ ദാസ് മാപ്പുസാക്ഷിയായി. തിരുവനന്തപുരം ഫസ്റ്റ് ക്ലാസ് മജിസ്ട്രേറ്റ് കോടതി സച്ചിൻ ദാസിന്റെ അപേക്ഷ അംഗീകരിച്ചു. പ്രോസിക്യൂഷനും സച്ചിനെ മാപ്പുസാക്ഷിയാക്കുന്നതിൽ എതിർപ്പ് പ്രകടിപ്പിച്ചില്ല. കഴിഞ്ഞ ജൂണിലാണ് സച്ചിൻ ഇതിനായി ഹർജി നൽകിയത്. 19-ന് സച്ചിന്റെ മൊഴി കോടതി രേഖപ്പെടുത്തും.
സ്പേസ് പാർക്കിലെ നിയമനത്തിനായി സ്വപ്ന വ്യാജ ബിരുദ സർട്ടിഫിക്കറ്റ് ഹാജരാക്കിയിരുന്നു. മഹാരാഷ്ട്രയിലെ ബാബാ അംബേക്കർ യൂണിവേഴ്സിറ്റിയുടെ പേരിലാണ് വ്യാജ രേഖയുണ്ടാക്കിയത്. സംഭവത്തില് കണ്ടോൻമെന്റ് പൊലീസാണ് സ്വപ്ന സുരേഷിനെ പ്രതിയാക്കി കേസ് രജിസ്റ്റര് ചെയ്തത്. കേസിലെ രണ്ടാം പ്രതിയായ സച്ചിൻ ദാസ് പഞ്ചാബ് സ്വദേശിയാണ്.
സച്ചിനെ മാപ്പുസാക്ഷിയാക്കിയതോടെ കേസില് സ്വപ്ന സുരേഷ് മാത്രമാണ് പ്രതി. സച്ചിനെ മാപ്പുസാക്ഷിയാക്കുന്നതിൽ എതിർപ്പില്ലെന്ന് പൊലീസ് കോടതിയെ അറിയിച്ചു. ഇതോടെ കേസിന്റെ തുടർനടപടികൾ സ്വപ്ന സുരേഷിനെ മാത്രം കേന്ദ്രീകരിച്ച് മുന്നോട്ട് പോകും. വ്യാജ സർട്ടിഫിക്കറ്റ് കേസിൽ സ്വപ്ന സുരേഷിന്റെ പങ്ക് സംബന്ധിച്ച് കൂടുതൽ വിവരങ്ങൾ പുറത്തുവരാൻ സാധ്യതയുണ്ട്.
Story Highlights: Sachin Das, second accused in Swapna Suresh’s fake degree case, turns approver
