ഹേമ കമ്മിറ്റി റിപ്പോർട്ട് പുറത്തുവിടൽ വൈകുന്നു; സർക്കാർ നിയമ സെക്രട്ടറിയുമായി കൂടിയാലോചന നടത്തും

സിനിമാ മേഖലയിലെ സ്ത്രീകളുടെ പ്രശ്നങ്ങൾ പഠിച്ച് സമർപ്പിച്ച ജസ്റ്റിസ് ഹേമ കമ്മിറ്റി റിപ്പോർട്ട് ഇന്ന് സർക്കാർ പുറത്തുവിടില്ല. റിപ്പോർട്ട് പുറത്തുവിടുന്നതിന് മുമ്പ് നിയമ സെക്രട്ടറിയുമായി കൂടിയാലോചന നടത്തണമെന്ന നിലപാടിലാണ് സർക്കാർ. നിയമതടസ്സങ്ങൾ ഇല്ലാതിരുന്നിട്ടും റിപ്പോർട്ട് പുറത്തുവിടുന്നതിൽ കാലതാമസം നേരിടുന്നത് ഡബ്ല്യുസിസിയിൽ നിന്നടക്കം വിമർശനങ്ങൾക്ക് കാരണമായിട്ടുണ്ട്.

2017 ഫെബ്രുവരി 17ന് നടി ആക്രമിക്കപ്പെട്ടതാണ് ഹേമ കമ്മിറ്റി രൂപീകരണത്തിലേക്ക് നയിച്ചത്. അതേ വർഷം ജൂലൈ ഒന്നിന് കമ്മിറ്റി നിലവിൽ വന്നു. രണ്ടുവർഷത്തിനുശേഷം 2019 ഡിസംബർ 31നാണ് കമ്മറ്റി മുഖ്യമന്ത്രിക്ക് റിപ്പോർട്ട് കൈമാറിയത്. പിന്നീട് റിപ്പോർട്ട് പുറത്തുവിടണമെന്ന ആവശ്യം ശക്തമായി. വിഷയം കോടതി കയറി, ഒടുവിൽ വിവരാവകാശ കമ്മീഷണർ എ. അബ്ദുൽ ഹക്കീം റിപ്പോർട്ട് പുറത്തുവിടാൻ ഉത്തരവിട്ടു.

295 പേജുകൾ ഉള്ള റിപ്പോർട്ടിലെ 62 പേജുകൾ ഒഴിവാക്കിയാകും റിപ്പോർട്ട് പുറത്തുവിടുന്നത്. നേരത്തെ പരസ്യമാക്കാൻ സാധിക്കില്ലെന്ന് അറിയിച്ചിരുന്ന ഭാഗങ്ങൾ തന്നെയാണ് ഒഴിവാക്കുക. നടിമാരും സാങ്കേതിക പ്രവർത്തകരും നൽകിയ മൊഴികളാണ് ഒഴിവാക്കുന്നവയിൽ ഭൂരിഭാഗവും. സർക്കാരിനോട് ആവശ്യപ്പെട്ട 5 മാധ്യമപ്രവർത്തകർക്കാണ് റിപ്പോർട്ട് നൽകുക.

Story Highlights: Kerala government delays release of Hema Committee report on women’s issues in film industry