കഴിഞ്ഞ 19 വർഷത്തിനിടയിൽ ആറു സംസ്ഥാനങ്ങളിലായി ഒമ്പത് കുടുംബങ്ങളെ വഞ്ചിച്ച് കടന്നുകളഞ്ഞ മോഷ്ടാവിനെ പൊലീസ് പിടികൂടി. രാജസ്ഥാൻ സ്വദേശിയായ ഇന്ദ്രരാജ് റാവത്ത് എന്ന ഈ മോഷ്ടാവ് കാണാതായ മകനെന്ന് അവകാശപ്പെട്ട് കുടുംബങ്ങളെ വിശ്വസിപ്പിച്ച് അവരോടൊപ്പം താമസിച്ച് മോഷണം നടത്തി മുങ്ങുകയായിരുന്നു പതിവ്. ഉത്തർപ്രദേശ് പൊലീസാണ് ഇയാളെ അറസ്റ്റ് ചെയ്തത്.
രാജസ്ഥാൻ, പഞ്ചാബ്, ഹരിയാന, ഡൽഹി, ഉത്തർപ്രദേശ്, ഉത്തരാഖണ്ഡ് എന്നീ സംസ്ഥാനങ്ങളിലെ കുടുംബങ്ങളാണ് ഇയാളുടെ തട്ടിപ്പിന് ഇരയായത്. കഴിഞ്ഞ മാസം 24-ന് രാജു എന്ന പേരിൽ ഇയാൾ ഖോഢ പൊലീസ് സ്റ്റേഷനിൽ എത്തി. 31 വർഷം മുമ്പ് മൂന്നംഗ സംഘം തട്ടിക്കൊണ്ടുപോയ കുട്ടിയാണ് താനെന്ന് പൊലീസിനോട് അവകാശപ്പെട്ടു. തുടർന്ന് പൊലീസിന്റെ സഹായത്തോടെ മകനെ കാണാതായ കുടുംബം ഇയാളെ സ്വീകരിച്ചു.
എന്നാൽ, പല പൊരുത്തക്കേടുകളും പൊലീസിന്റെ ശ്രദ്ധയിൽപ്പെട്ടതോടെ കൂടുതൽ ചോദ്യം ചെയ്തപ്പോഴാണ് ഇത് ഇയാളുടെ സ്ഥിരം പരിപാടിയാണെന്ന് വെളിവായത്. വർഷങ്ങൾക്ക് മുമ്പ് സ്വന്തം കുടുംബം പുറത്താക്കിയതിനു ശേഷമാണ് ഇയാൾ ഈ തട്ടിപ്പ് രീതി സ്വീകരിച്ചത്. ആൺകുട്ടികളെ നഷ്ടപ്പെട്ട കുടുംബങ്ങളെ ലക്ഷ്യമിട്ട് കള്ളക്കഥകൾ മെനഞ്ഞ് അവരുടെ വിശ്വാസം നേടിയെടുക്കും. തുടർന്ന് ആ വീടുകളിൽ സ്ഥിരമായി മോഷണം നടത്തി, പിടിയിലാകുമെന്ന് ഉറപ്പാകുമ്പോൾ അവിടെ നിന്നും രക്ഷപ്പെടും. ഈ സംഭവത്തിൽ പൊലീസ് കൂടുതൽ അന്വേഷണം നടത്താൻ ഒരുങ്ങുകയാണ്.
Story Highlights: Serial thief posing as long-lost son arrested after deceiving nine families across six states over 19 years.
