മുതിര്‍ന്ന കോണ്‍ഗ്രസ് നേതാവും കര്‍ഷക കോണ്‍ഗ്രസിന്റെ മുന്‍ സംസ്ഥാന പ്രസിഡന്റുമായ ലാല്‍ വര്‍ഗീസ് കല്‍പകവാടി (72) അന്തരിച്ചു. തിരുവല്ലയിലെ സ്വകാര്യ ആശുപത്രിയില്‍ രാത്രി 8.30ഓടെയായിരുന്നു അന്ത്യം. ഹൃദയസംബന്ധമായ അസുഖങ്ങള്‍ മൂലം ചികിത്സയിലായിരുന്നു അദ്ദേഹം. കിസാന്‍ കോണ്‍ഗ്രസിന്റെ ദേശീയ ഉപാധ്യക്ഷനും കെപിസിസി എക്‌സിക്യൂട്ടീവ് അംഗവുമായിരുന്നു ലാല്‍ വര്‍ഗീസ്.
17 വര്‍ഷം സംസ്ഥാന കര്‍ഷക കോണ്‍ഗ്രസിനെ നയിച്ച ലാല്‍ വര്‍ഗീസ്, താഴെത്തട്ടില്‍ കോണ്‍ഗ്രസിന് സ്വാധീനം വളര്‍ത്തിയെടുക്കുന്നതില്‍ നിര്‍ണായക പങ്കുവഹിച്ച നേതാവായിരുന്നു. നിരവധി കര്‍ഷക സമരങ്ങളുടെ ഭാഗമായിട്ടുള്ള അദ്ദേഹം, കോണ്‍ഗ്രസ് ദേശീയ നേതാക്കളുമായി അടുത്ത ബന്ധം പുലര്‍ത്തിയിരുന്നു.
കമ്മ്യൂണിസ്റ്റ് നേതാവ് ടികെ വര്‍ഗീസ് വൈദ്യന്റെ മകനും തിരക്കഥാകൃത്ത് ചെറിയാന്‍ കല്‍പകവാടിയുടെ സഹോദരനുമാണ് ലാല്‍ വര്‍ഗീസ് കല്‍പകവാടി. മൃതദേഹം ചൊവ്വാഴ്ച രാവിലെ എട്ടരയോടെ ആലപ്പുഴയിലെ വീട്ടിലെത്തിക്കും. അന്നു തന്നെ നാലാരയ്ക്കാണ് ശവസംസ്‌കാരം നടക്കുക.
Story Highlights: Senior Congress leader Lal Varghese Kalpakavadi passes away at 72
