മുംബൈയിലെ ഡോക്യാർഡിൽ വച്ച് ഐഎൻഎസ് ബ്രഹ്മപുത്രയ്ക്ക് തീപിടിച്ച സംഭവത്തിൽ കാണാതായ നാവികനെ കണ്ടെത്താനുള്ള തിരച്ചിൽ തുടരുകയാണ്. വൈസ് അഡ്മിറൽ കൃഷ്ണ സ്വാമിനാഥന്റെ അഭിപ്രായത്തിൽ, നാവികനെക്കുറിച്ച് യാതൊരു വിവരവും ലഭിച്ചിട്ടില്ല. കടലിൽ തിരച്ചിൽ നടക്കുന്നുണ്ടെന്നും അദ്ദേഹം അറിയിച്ചു.
തീപിടിത്തത്തിനിടെ വെള്ളത്തിലേക്ക് ചാടിയ നാവികനെ നീന്തി വരുന്നതായി കണ്ടെന്ന ദൃക്സാക്ഷി മൊഴിയുണ്ടെങ്കിലും, പിന്നീട് അദ്ദേഹത്തെക്കുറിച്ച് യാതൊരു വിവരവുമില്ല. തീപിടിത്തത്തെ തുടർന്ന് കപ്പൽ ഒരു വശത്തേക്ക് ചെരിഞ്ഞ് കിടക്കുകയാണ്. ഇത് നേരെയാക്കാനുള്ള ശ്രമങ്ങൾ ഫലം കണ്ടിട്ടില്ല.
കപ്പലിന് അതീവ ഗുരുതരമായ തകരാർ സംഭവിച്ചതായാണ് വിലയിരുത്തൽ. ഇത് സ്ഥിരീകരിക്കാൻ കൂടുതൽ പരിശോധനകൾ ആവശ്യമാണ്. ഇന്നലെ നാവിക സേനാ മേധാവി മുംബൈയിലെത്തി നേരിട്ട് വിവരശേഖരണം നടത്തി. 2000 മുതൽ നാവിക സേനയുടെ ഭാഗമായ ഐഎൻഎസ് ബ്രഹ്മപുത്രയുടെ തകരാറുകൾ പരിഹരിക്കാനുള്ള ശ്രമങ്ങളും ഉടൻ ആരംഭിക്കും.
