Sandeep Varier meets Samastha President, presents Constitution copy

സമസ്ത പ്രസിഡന്റ് മുഹമ്മദ് ജിഫ്രി മുത്തുക്കോയ തങ്ങളെ സന്ദര്ശിച്ച് സന്ദീപ് വാര്യര് എത്തി. മലപ്പുറം കഴിശ്ശേരിയിലെ ജിഫ്രി തങ്ങളുടെ വീട്ടിലാണ് കൂടിക്കാഴ്ച നടന്നത്. സന്ദര്ശനത്തിനിടെ, സന്ദീപ് വാര്യര് ഇന്ത്യന് ഭരണഘടനയുടെ കയ്യെഴുത്ത് പതിപ്പ് ജിഫ്രി തങ്ങള്ക്ക് കൈമാറി. തങ്ങളോട് അത്യധികം ആദരവുണ്ടെന്നും ഇത്തരമൊരു മഹാനെ കാണാന് ഏറെ നാളായി ആഗ്രഹിച്ചിരുന്നതായും സന്ദീപ് പറഞ്ഞു.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

സമസ്തയുടെ സംഭാവനകള് കേരളത്തിന്റെ ചരിത്രത്തില് സുവര്ണ്ണലിപികളില് രേഖപ്പെടുത്തപ്പെടുമെന്നും ആ ആദരവ് കൂടിയാണ് അര്പ്പിക്കുന്നതെന്നും സന്ദീപ് വാര്യര് പ്രതികരിച്ചു. വിവിധ സാമൂഹിക മേഖലകളില് കേരളത്തെ നയിക്കുന്നവരെ കാണുകയും അനുഗ്രഹം വാങ്ങുകയും ചെയ്യുന്നത് നല്ല കാര്യമാണെന്നും അദ്ദേഹം കൂട്ടിച്ചേര്ത്തു. ഇത്തരം കൂടിക്കാഴ്ചകള് മതേതരത്വത്തിന്റെയും സാമൂഹിക സമരസതയുടെയും സന്ദേശം നല്കുന്നതിനാല് നാടിന് ഗുണകരമാണെന്നും അദ്ദേഹം വ്യക്തമാക്കി.

മതസൗഹാര്ദത്തിന് ഊന്നല് നല്കുന്ന സംഘടനയാണ് സമസ്തയെന്ന് മുഹമ്മദ് ജിഫ്രി മുത്തുക്കോയ തങ്ങള് പ്രതികരിച്ചു. വിഭാഗീയത വളര്ത്താന് സമസ്ത ഒരിക്കലും ശ്രമിച്ചിട്ടില്ലെന്നും തുറന്ന പുസ്തകമാണ് സമസ്തയുടെ ചരിത്രമെന്നും അദ്ദേഹം പറഞ്ഞു. ഇന്ത്യയില് നന്മ ചെയ്യുന്ന എല്ലാവരോടും യോജിക്കുമെന്നും പത്രത്തില് ആര് പരസ്യം തന്നാലും സ്വീകരിക്കുമെന്നും തങ്ങള് വ്യക്തമാക്കി. സുപ്രഭാതം ദിനപത്രത്തില് വന്ന ഒരു പരസ്യവുമായി ബന്ധപ്പെട്ട് സമസ്ത നേതൃത്വം നിലപാട് വ്യക്തമാക്കിയിരുന്നു. ഏതെങ്കിലും മുന്നണിയെയോ പാര്ട്ടിയെയോ വോട്ട് ചെയ്ത് വിജയിപ്പിക്കണമെന്ന് അഭ്യര്ത്ഥിക്കുന്ന പാരമ്പര്യം സമസ്തക്കില്ലെന്ന് നേതാക്കള് വ്യക്തമാക്കി.