റഷ്യൻ സൈന്യത്തിൽ നിർബന്ധിത സേവനം ചെയ്യുന്ന ഇന്ത്യക്കാരെ മോചിപ്പിക്കാൻ റഷ്യ സമ്മതിച്ചതോടെ പ്രധാനമന്ത്രി നരേന്ദ്ര മോദിയുടെ റഷ്യൻ സന്ദർശനം വൻ നയതന്ത്ര വിജയമായി. പ്രധാനമന്ത്രിയും റഷ്യൻ പ്രസിഡന്റ് വ്ലാഡിമിർ പുടിനും തമ്മിലുള്ള കൂടിക്കാഴ്ചയിലാണ് ഈ തീരുമാനമുണ്ടായത്. ഇന്ത്യക്കാരെ തിരികെ അയക്കുമെന്ന് റഷ്യ ഉറപ്പ് നൽകി.
ജോലി തട്ടിപ്പിനിരയായി നിരവധി ഇന്ത്യക്കാർ റഷ്യൻ സൈന്യത്തിൽ കുടുങ്ങിയിരുന്നു. കേരളത്തിൽ നിന്നുൾപ്പെടെയുള്ളവർ ഇത്തരത്തിൽ റഷ്യയിൽ കുടുങ്ങിയിരുന്നു. യാതൊരു പരിശീലനവും നൽകാതെ ഇവരെ യുക്രൈൻ യുദ്ധ മേഖലയിൽ വിന്യസിപ്പിച്ചിരുന്നു. ഇതിനെ തുടർന്ന് കുടുംബങ്ങൾ കേന്ദ്ര സർക്കാരിന്റെ ഇടപെടൽ ആവശ്യപ്പെട്ട് രംഗത്തെത്തിയിരുന്നു.
ഇന്ത്യ-റഷ്യ വാർഷിക ഉച്ചകോടിയിൽ പങ്കെടുക്കാനായി പുടിന്റെ ക്ഷണം സ്വീകരിച്ചാണ് മോദി റഷ്യയിലെത്തിയത്. രണ്ട് ദിവസത്തെ സന്ദർശനമാണ് നടത്തുന്നത്. യുക്രൈൻ-റഷ്യ യുദ്ധം തുടങ്ങിയ ശേഷം ആദ്യമായാണ് മോദി റഷ്യയിലേക്ക് പോകുന്നത്. കഴിഞ്ഞ രണ്ട് വർഷമായി ഇരു നേതാക്കളും തമ്മിൽ കൂടിക്കാഴ്ച നടത്തിയിരുന്നില്ല. റഷ്യൻ സന്ദർശനത്തിന് ശേഷം മോദി ഓസ്ട്രിയയും സന്ദർശിക്കും.
