കേരളത്തിൽ നിന്നുള്ള മൂന്ന് രാജ്യസഭാംഗങ്ങൾ ഇന്ന് സത്യപ്രതിജ്ഞ ചെയ്തു. മുസ്ലിം ലീഗ് പ്രതിനിധി ഹാരിസ് ബീരാൻ, കേരള കോൺഗ്രസ് മാണി അംഗം ജോസ് കെ മാണി, സി.പി.ഐ അംഗം പി. പി സുനിർ എന്നിവരാണ് തുടർച്ചയായി സത്യവാചകം ചൊല്ലിയത്. രാജ്യസഭ നടപടികളിലെ ആദ്യ ഇനമായിരുന്നു സത്യപ്രതിജ്ഞ.
സുപ്രീംകോടതി അഭിഭാഷകനും ഡൽഹി കെഎംസിസി പ്രസിഡന്റുമായ ഹാരിസ് ബീരാൻ, എം എസ് എഫിലൂടെയാണ് സംഘടനാ രംഗത്തെത്തിയത്. സിപിഐ സംസ്ഥാന അസിസ്റ്റന്റ് സെക്രട്ടറിയും നിലവിൽ ഹൗസിങ് ബോർഡ് ചെയർമാനുമായ പി പി സുനീർ, മലപ്പുറം പൊന്നാനി സ്വദേശിയാണ്. 2019ലെ ലോക്സഭാ തിരഞ്ഞെടുപ്പിൽ വയനാട്ടിൽ രാഹുൽ ഗാന്ധിക്കെതിരെ മത്സരിച്ചിരുന്നു. ജോസ് കെ മാണി 2009 മുതൽ 2018 വരെ ലോക്സഭയിലും 2018 മുതൽ 2021 വരെ രാജ്യസഭയിലും അംഗമായി പ്രവർത്തിച്ചു. 2021 നവംബർ 28 മുതൽ ഇടതു മുന്നണിയുടെ രാജ്യസഭാംഗമായിരുന്നു. തനിക്ക് കിട്ടിയ പദവി മലബാറിലെ ജനങ്ങൾക്കുള്ള എൽ.ഡി.എഫിന്റെ അംഗീകാരമാണെന്ന് പി.പി സുനിർ പറഞ്ഞു.
