പാലക്കാട് സ്വതന്ത്ര സ്ഥാനാർത്ഥിയാകാൻ പി സരിനോട് പി വി അൻവർ ആവശ്യപ്പെട്ടു. തിരുവില്വാമലയിൽ വച്ച് നടന്ന കൂടിക്കാഴ്ചയിൽ ഡിഎംകെയുടെ പൂർണ്ണപിന്തുണയും വാഗ്ദാനം ചെയ്തു. ഒന്നര മണിക്കൂറോളം നീണ്ട കൂടിക്കാഴ്ചയിൽ ബന്ധുവിന്റെ വീട്ടിലാണ് ഇരുവരും നേരിട്ടെത്തിയത്. എന്നാൽ നിലവിൽ പി സരിൻ അനുകൂല മറുപടി നൽകിയിട്ടില്ല. ഇന്നു രാത്രി ആലോചിക്കാനുള്ള സമയം അൻവർ നൽകിയിട്ടുണ്ട്. നാളെ പകൽ വീണ്ടും മാധ്യമങ്ങളെ കാണുമെന്നും, അതിനു മുന്നോടിയായി മറുപടി അറിയിക്കാനാണ് നിർദ്ദേശമെന്നും അറിയിച്ചു.
കെപിസിസി സെക്രട്ടറി എൻ സുധീറുമായും പി വി അൻവർ ചർച്ച നടത്തിയിട്ടുണ്ട്. ചേലക്കരയിൽ സ്ഥാനാർത്ഥിയാകണമെന്നാണ് നിർദേശം. എന്നാൽ സരിനു പിന്നാലെ സുധീറും ആവശ്യം നിരസിച്ചു. അതേസമയം, ഇന്ന് ചേർന്ന സിപിഐഎം പാലക്കാട് ജില്ലാ സെക്രട്ടറിയേറ്റ് സരിനെ പിന്തുണച്ചിട്ടുണ്ട്. സരിൻ പാലക്കാട് മത്സരിച്ചാൽ ഗുണം ചെയ്യുമെന്നാണ് വിലയിരുത്തൽ. അനുകൂല സാഹചര്യം മുതലെടുക്കാൻ ജില്ലാ സെക്രട്ടറിയേറ്റ് തീരുമാനിച്ചിട്ടുണ്ടെന്നാണ് വിവരം.
നേരത്തെ, മുതിർന്ന നേതാവ് എ.കെ.ബാലൻ അടക്കമുള്ളവർ സരിനോട് ആശയവിനിമയം നടത്തുന്നതായി റിപ്പോർട്ടുകളുണ്ടായിരുന്നു. സരിൻ നിലപാട് വ്യക്തമാക്കിയാൽ അന്തിമ തീരുമാനത്തിലേക്ക് കടക്കുമെന്ന് സി.പി.ഐ.എം ജില്ലാ സെക്രട്ടറി ഇ.എൻ.സുരേഷ്ബാബു പ്രതികരിച്ചിട്ടുണ്ട്. സരിന്റെ തീരുമാനം കാത്ത് അൻവർ തൃശ്ശൂരിൽ തുടരുകയാണ്.
Story Highlights: PV Anwar requests P Sarin to contest as independent candidate in Palakkad with DMK support
