അടിമാലി പൊലീസ് നടന്‍ ബാബുരാജിനെതിരെ പീഡനക്കേസ് രജിസ്റ്റര്‍ ചെയ്തു. സിനിമയില്‍ അവസരം വാഗ്ദാനം ചെയ്ത് പീഡിപ്പിച്ചെന്ന യുവതിയുടെ പരാതിയിലാണ് നടപടി. ഡിഐജിക്ക് മെയില്‍ വഴി ലഭിച്ച പരാതി അടിമാലി പൊലീസിന് കൈമാറിയതിനെ തുടര്‍ന്നാണ് കേസെടുത്തത്. 2019-ല്‍ അടിമാലി കമ്പിലൈനിലെ ബാബുരാജിന്റെ റിസോര്‍ട്ടിലും എറണാകുളത്തും വെച്ചാണ് പീഡനം നടന്നതെന്നാണ് പരാതി. യുവതിയുടെ മൊഴി ഓണ്‍ലൈനില്‍ രേഖപ്പെടുത്തിയ ശേഷമാണ് പൊലീസ് കേസ് രജിസ്റ്റര്‍ ചെയ്തത്.
അതേസമയം, നടന്‍ ജയസൂര്യയ്ക്കെതിരെയുള്ള പീഡനപരാതിയില്‍ തൊടുപുഴ പൊലീസ് പ്രാഥമിക അന്വേഷണം ആരംഭിച്ചു. 2013-ല്‍ സിനിമ ചിത്രീകരണത്തിനിടെ നടന്‍ തന്നെ കടന്നുപിടിച്ചെന്നാണ് നടിയുടെ പരാതി. അന്വേഷണത്തിന്റെ ഭാഗമായി നടിയില്‍ നിന്ന് വിവരങ്ങള്‍ ശേഖരിച്ച പൊലീസ്, തുടര്‍ന്ന് നടിയെ വിളിച്ചുവരുത്തി തെളിവെടുപ്പ് നടത്തും. കരമന പൊലീസ് രജിസ്റ്റര്‍ ചെയ്ത എഫ്‌ഐആര്‍ തൊടുപുഴ പൊലീസിന് കൈമാറിയിരുന്നു.
ഹേമ കമ്മിറ്റി റിപ്പോര്‍ട്ട് പുറത്തുവന്നതിനു ശേഷം സിനിമാ മേഖലയില്‍ നിന്ന് നിരവധി സ്ത്രീകള്‍ തങ്ങള്‍ക്ക് നേരിടേണ്ടി വന്ന ലൈംഗികാതിക്രമങ്ങളെക്കുറിച്ച് തുറന്നുപറയുന്നുണ്ട്. ഇത്തരം പരാതികളില്‍ സിദ്ധിഖ്, ജയസൂര്യ, ഇടവേള ബാബു, മുകേഷ്, മണിയന്‍പിള്ള രാജു തുടങ്ങിയവര്‍ക്കെതിരെ പൊലീസ് അന്വേഷണം ആരംഭിച്ചിട്ടുണ്ട്.
Story Highlights: Police case against actor Baburaj for sexual assault, investigation begins on complaint against Jayasurya
