പ്രതിപക്ഷത്തിനെതിരെ രൂക്ഷ വിമർശനവുമായി പ്രധാനമന്ത്രി നരേന്ദ്രമോദി ലോക്സഭയിൽ മറുപടി പ്രസംഗം നടത്തി. തെരഞ്ഞെടുപ്പിൽ തോറ്റ പ്രതിപക്ഷത്തിന്റെ വേദന തനിക്ക് മനസ്സിലാകുമെന്നും എൻഡിഎ മൂന്നാമതും വൻ വിജയം നേടിയെന്നും മോദി പറഞ്ഞു. രാജ്യത്ത് കുറേക്കാലമായി നിലനിന്നിരുന്ന പ്രീണനരാഷ്ട്രീയം ജനങ്ങൾ തള്ളിക്കളഞ്ഞതായും അദ്ദേഹം ചൂണ്ടിക്കാട്ടി.
കോൺഗ്രസ് ഭരണകാലത്തെ അഴിമതി പരമ്പരകളെ കുറിച്ച് പരാമർശിച്ച പ്രധാനമന്ത്രി, അഴിമതിയോട് സന്ധി ചെയ്യാത്ത തങ്ങളുടെ നയങ്ങൾക്ക് ജനങ്ങൾ അംഗീകാരം നൽകിയതായി പറഞ്ഞു. 250 മില്യൺ ജനങ്ങളെ ദാരിദ്ര്യത്തിൽ നിന്ന് മോചിപ്പിക്കാൻ സർക്കാർ പ്രതിജ്ഞാബദ്ധമാണെന്നും അദ്ദേഹം കൂട്ടിച്ചേർത്തു. പ്രധാനമന്ത്രിയുടെ പ്രസംഗത്തിനിടെ മണിപ്പൂർ വിഷയം ഉന്നയിച്ച് പ്രതിപക്ഷം ബഹളം വച്ചു. രാഹുൽ ഗാന്ധിയുടെ നേതൃത്വത്തിൽ പ്രതിപക്ഷം സഭയുടെ നടുത്തളത്തിലിറങ്ങി പ്രതിഷേധിച്ചു. ഇതിനെതിരെ സ്പീക്കർ ഓം ബിർല രൂക്ഷമായി വിമർശിക്കുകയും ചെയ്തു.
