Kerala CM slams BJP-Congress alliance, accuses Centre of minority attacks

ചേലക്കരയിലെ തിരഞ്ഞെടുപ്പ് റാലി ഉദ്ഘാടനത്തിൽ സംസാരിച്ച മുഖ്യമന്ത്രി പിണറായി വിജയൻ, ചിലർ ചേലക്കര പിടിക്കുമെന്ന വ്യാമോഹം പരസ്യമായി പറയുന്നുവെന്ന് അഭിപ്രായപ്പെട്ടു. കേന്ദ്രം ഭരിക്കുന്നവർ ന്യൂനപക്ഷങ്ങളെ അക്രമിക്കാൻ നേതൃത്വം നൽകുകയാണെന്നും, രാജ്യത്ത് ക്രൈസ്തവ വിഭാഗം സംഘപരിവാർ അക്രമണം നേരിടുന്നുവെന്നും അദ്ദേഹം ചൂണ്ടിക്കാട്ടി. കേന്ദ്ര സര്ക്കാര് അക്രമികള്ക്ക് സംരക്ഷണം നൽകുകയാണെന്നും, ചുരുക്കം ചിലരെ മാത്രമാണ് ശിക്ഷിക്കുന്നതെന്നും മുഖ്യമന്ത്രി കുറ്റപ്പെടുത്തി.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

ബിജെപി ഉള്ളിടത്തോളം കാലം ന്യൂനപക്ഷങ്ങളെ പരിഗണിക്കില്ലെന്ന അമിത് ഷായുടെ പ്രസ്താവന ഉദ്ധരിച്ച മുഖ്യമന്ത്രി, കേന്ദ്രത്തിന്റെ നിലപാടുകൾ അപകടകരമാണെന്നും, അവർ വെറുപ്പിന്റെ അന്തരീക്ഷം നിലനിർത്തുന്നുവെന്നും പറഞ്ഞു. രാഷ്ട്രീയ ലാഭമാണ് ബിജെപിയുടെ ലക്ഷ്യമെന്നും, ഈ വെറുപ്പിന്റെ രാഷ്ട്രീയത്തിൽ നിന്ന് വിട്ടു നിൽക്കുന്നത് കേരളം മാത്രമാണെന്നും അദ്ദേഹം വ്യക്തമാക്കി. എട്ടര വർഷമായി കേരളത്തിൽ വർഗീയ സംഘർഷങ്ങളില്ലെന്നും മുഖ്യമന്ത്രി അവകാശപ്പെട്ടു.

കേരളത്തിൽ ക്രമസമാധാനം ഭദ്രമാണെന്നും, ഒരു കുറ്റവാളിക്കും സംരക്ഷണമില്ലെന്നും മുഖ്യമന്ത്രി പറഞ്ഞു. ഭൂരിപക്ഷ വർഗീയതയോടും ന്യൂനപക്ഷ വർഗീയതയോടും സർക്കാരിന് ഒരേ നിലപാടാണുള്ളതെന്നും അദ്ദേഹം വ്യക്തമാക്കി. എൽഡിഎഫിനെതിരെ യുഡിഎഫും ബിജെപിയും ഒന്നായി മാറുന്നുവെന്നും, കേരളത്തിൽ ബിജെപി-കോൺഗ്രസ്സ് അവിശുദ്ധ കൂട്ടുകെട്ട് പല സ്ഥലത്ത് പലവിധത്തില് നടപ്പാക്കുന്നുവെന്നും മുഖ്യമന്ത്രി ആരോപിച്ചു. തൃശൂരിലെ ബിജെപി വിജയത്തില് വോട്ടിന്റെ കണക്ക് പരിശോധിച്ചാല് ആരുടെ വോട്ടാണ് ബിജെപിക്ക് പോയതെന്ന് വ്യക്തമാകുമെന്നും അദ്ദേഹം കൂട്ടിച്ചേർത്തു.