പാലോട് നവവധുവിന്റെ മരണം കൊലപാതകമാണെന്ന് പിതാവ് ശശിധരൻ കാണി ആരോപിച്ചു. മകൾ ഇന്ദുജയെ ഭർത്താവ് അഭിജിത്ത് നിരന്തരം ഉപദ്രവിച്ചിരുന്നതായി അദ്ദേഹം വെളിപ്പെടുത്തി. ഭർത്താവിനെ ഭയന്ന് രണ്ടു തവണ മകൾ സ്വന്തം വീട്ടിൽ അഭയം തേടിയിരുന്നതായും ശശിധരൻ കാണി ട്വന്റിഫോറിനോട് പറഞ്ഞു.
മകൾ ആത്മഹത്യ ചെയ്യില്ലെന്ന് ഉറപ്പിച്ചു പറഞ്ഞ പിതാവ്, ഭർതൃവീട്ടിൽ ഇന്ദുജ കഠിനമായ പീഡനങ്ങൾക്ക് ഇരയായിരുന്നുവെന്നും വ്യക്തമാക്കി. മകളെ കൊലപ്പെടുത്തിയതാണെന്ന് അദ്ദേഹം ആരോപിച്ചു. ഭർത്താവിനെ ഭയന്ന് വീട്ടിൽ വന്നിരുന്ന സമയങ്ങളിൽ ഇന്ദുജയുടെ ശരീരത്തിൽ മുറിവുകളുടെ പാടുകൾ കണ്ടിരുന്നതായും, ഗാർഹിക പീഡനത്തിന് ഇരയായിരുന്നുവെന്നും പിതാവ് വെളിപ്പെടുത്തി.
ഇന്ദുജയുടെ ബന്ധു സുനിൽ കുമാർ പറഞ്ഞതനുസരിച്ച്, ആദിവാസി വിഭാഗക്കാരായതിനാൽ അവരുടെ വീട്ടിൽ വരാൻ പാടില്ലെന്ന് ഭർതൃവീട്ടുകാർ പറഞ്ഞിരുന്നു. വിവാഹം രജിസ്റ്റർ ചെയ്യാൻ ആവശ്യപ്പെട്ടപ്പോൾ ജാതി അധിക്ഷേപം നേരിട്ടതായും അദ്ദേഹം വ്യക്തമാക്കി. കഴിഞ്ഞാഴ്ച ഇന്ദുജയെ കണ്ടപ്പോൾ കണ്ണിന് മുകളിൽ മുറിവിന്റെ പാട് കണ്ടതായും സുനിൽ കുമാർ പറഞ്ഞു.
മാനസികമായി വലിയ സമ്മർദ്ദത്തിലായിരുന്നു ഇന്ദുജയെന്നും, ഭർതൃമാതാവുമായി പ്രശ്നങ്ങൾ ഉണ്ടായിരുന്നതായും സുനിൽ കുമാർ വെളിപ്പെടുത്തി. അഭിജിത്തിന്റെ വീട്ടിൽ മാനസിക, ശാരീരിക പീഡനങ്ങൾ നേരിട്ടതായും അദ്ദേഹം പറഞ്ഞു. അഭിജിത്തിന്റെ വീട്ടിലെ രണ്ടാം നിലയിലെ ബെഡ്റൂമിന്റെ ജനലിൽ കെട്ടിത്തൂങ്ങിയ നിലയിലാണ് ഇന്ദുജയെ കണ്ടെത്തിയത്. സംഭവവുമായി ബന്ധപ്പെട്ട് ഭർത്താവ് അഭിജിത്തിനെ പോലീസ് കസ്റ്റഡിയിലെടുത്ത് വിശദമായി ചോദ്യം ചെയ്യുന്നുണ്ട്.
Story Highlights: Thiruvananthapuram Palode newlywed’s death is murder, father alleges domestic violence and caste discrimination
