Palakkad Lorry Accident: Minister Orders Probe into Student Deaths

പാലക്കാട് മണ്ണാർക്കാട് പനയംപാടത്ത് ഉണ്ടായ ദാരുണമായ ലോറി അപകടത്തിൽ നാല് വിദ്യാർഥികളുടെ മരണത്തെ തുടർന്ന് വിദ്യാഭ്യാസ മന്ത്രി വി. ശിവൻകുട്ടി സംഭവത്തിൽ അന്വേഷണം പ്രഖ്യാപിച്ചു. സംഭവത്തെക്കുറിച്ച് വിശദമായി അന്വേഷിച്ച് അടിയന്തര റിപ്പോർട്ട് സമർപ്പിക്കാൻ പാലക്കാട് ജില്ലാ കളക്ടറെ ചുമതലപ്പെടുത്തിയതായി മന്ത്രി അറിയിച്ചു. കൂടാതെ, സംഭവസ്ഥലം സന്ദർശിക്കാൻ പൊതു വിദ്യാഭ്യാസ ഡയറക്ടർക്കും നിർദേശം നൽകി.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

കല്ലടിക്കോട് കരിമ്പ ഹയർ സെക്കൻഡറി സ്കൂളിലെ എട്ടാം ക്ലാസ് വിദ്യാർഥിനികളായ നിദ, റിദ, ഇർഫാന, ആയിഷ എന്നിവരാണ് ഈ ദുരന്തത്തിൽ ജീവൻ നഷ്ടപ്പെട്ടത്. പരീക്ഷ കഴിഞ്ഞ് വീട്ടിലേക്ക് മടങ്ങുന്നതിനിടെയാണ് ഈ അപകടം സംഭവിച്ചത്. മൂന്ന് കുട്ടികളുടെ മൃതദേഹം ഇസാഫ് ആശുപത്രിയിലും ഒരു കുട്ടിയുടെ മൃതദേഹം മദർ കെയർ ഹോസ്പിറ്റലിലുമാണ് സൂക്ഷിച്ചിരിക്കുന്നത്. മരണമടഞ്ഞ കുട്ടികളുടെ കുടുംബങ്ങളോട് മന്ത്രി അനുശോചനം രേഖപ്പെടുത്തി.

വൈകുന്നേരം നാലു മണിയോടെയാണ് ഈ ദാരുണമായ അപകടം സംഭവിച്ചത്. എതിർദിശയിൽ നിന്നും വന്ന സിമന്റ് ലോഡുമായി വന്ന ലോറി നിയന്ത്രണം വിട്ട് കുട്ടികൾക്കിടയിലേക്ക് പാഞ്ഞുകയറുകയായിരുന്നു. തുടർന്ന് ലോറി വീടിനോട് ചേർന്ന മരത്തിൽ ഇടിച്ച് മറിഞ്ഞു. നാട്ടുകാരാണ് രക്ഷാപ്രവർത്തനം നടത്തിയത്. ഗുരുതരമായി പരിക്കേറ്റ ഒരു കുട്ടി ഇപ്പോഴും ആശുപത്രിയിൽ ചികിത്സയിലാണ്. ഈ സംഭവത്തെ തുടർന്ന് പ്രദേശവാസികൾ ശക്തമായ പ്രതിഷേധവുമായി രംഗത്തെത്തിയിട്ടുണ്ട്.