ഓപ്പോ പാഡ് 5 വരുന്നു; സവിശേഷതകൾ അറിയാം

ആപ്പിളും സാംസങും റെഡ്മിയും ലെനോവോയും വൺപ്ലസുമൊക്കെ ടാബ്ലറ്റ് വിപണി അടക്കി വാഴുകയാണ്. ഈ രംഗത്തേക്ക് പുതിയൊരു പോരാളിയുമായി ഓപ്പോ എത്തുന്നുവെന്നാണ് പുതിയ റിപ്പോർട്ടുകൾ. ഒക്ടോബർ 13-ന് ചൈനയിൽ നടക്കുന്ന ഓപ്പോയുടെ ഫൈൻഡ് എക്സ് 9 സീരീസ് ലോഞ്ചിനൊപ്പം ഓപ്പോ പാഡ് 5 അവതരിപ്പിക്കുമെന്നാണ് സൂചന.

ഓപ്പോ പാഡ് 5-ന്റെ പ്രധാന ഫീച്ചറുകൾ എന്തൊക്കെയെന്ന് നോക്കാം. ശക്തമായ മീഡിയടെക് ഡൈമൻസിറ്റി 9400+ ചിപ്പ്സെറ്റാണ് ഈ ടാബിന് കരുത്ത് പകരുന്നത്. ഇതിന് 144Hz റിഫ്രഷ് റേറ്റുള്ള 12.1 ഇഞ്ച് 3K+ LCD ഡിസ്പ്ലേ ഉണ്ടായിരിക്കും. ഓപ്പോയുടെ ഈ പുതിയ ടാബ് മൾട്ടിമീഡിയ ഉപയോഗത്തിന് മികച്ച അനുഭവമായിരിക്കും നൽകുക. 67W വയർഡ് ഫാസ്റ്റ് ചാർജിംഗ് സപ്പോർട്ടുള്ള 10,300mAhന്റെ വലിയ ബാറ്ററിയാണ് ഇതിൽ ഉപയോഗിച്ചിരിക്കുന്നത്. ടാബിന് ഏകദേശം 579 ഗ്രാം ഭാരമുണ്ടാകും. ഓപ്പോ പാഡ് 5 പ്രധാനമായും മൂന്ന് നിറങ്ങളിലാണ് വിപണിയിൽ എത്താൻ സാധ്യത. ഗ്രേ, പർപ്പിൾ, സിൽവർ എന്നീ നിറങ്ങളിലാണ് ഇത് ലഭ്യമാകുക. 8GB + 128GB, 8GB + 256GB, 12GB + 256GB, 16GB + 512GB RAM എന്നിങ്ങനെ വിവിധ സ്റ്റോറേജ് വേരിയന്റുകളിൽ ടാബ് ലഭ്യമാകും. പുറത്തിറങ്ങാൻ പോകുന്ന ഓപ്പോ പാഡ് 5-ന് ഏകദേശം 50000 രൂപ പ്രാരംഭവില പ്രതീക്ഷിക്കാം. നിലവിൽ വിപണിയിലുള്ള ഓപ്പോ പാഡ് 4 പ്രോയുടെ ആരംഭ വില ഏകദേശം 42000 രൂപയാണ്. Story Highlights: ഓപ്പോയുടെ ഫൈൻഡ് എക്സ് 9 സീരീസ് ഒക്ടോബർ 13-ന് ചൈനയിൽ ലോഞ്ച് ചെയ്യുമ്പോൾ ഓപ്പോ പാഡ് 5 ഉം അവതരിപ്പിക്കും .