ഹരിയാനയിലെ നിയമസഭാ തിരഞ്ഞെടുപ്പില്‍ കോണ്‍ഗ്രസും ആം ആദ്മി പാര്‍ട്ടിയും തമ്മിലുള്ള സഖ്യ ചര്‍ച്ചകള്‍ പരാജയപ്പെട്ടു. സീറ്റുകളുടെ എണ്ണത്തില്‍ വിട്ടുവീഴ്ച ചെയ്യാന്‍ ഇരു പാര്‍ട്ടികളും തയ്യാറാകാത്തതാണ് കാരണം. ആം ആദ്മി പാര്‍ട്ടി കുറഞ്ഞത് 10 സീറ്റുകളില്‍ മത്സരിക്കണമെന്ന് നിലപാടെടുത്തപ്പോള്‍, കോണ്‍ഗ്രസ് പരമാവധി 6 സീറ്റുകള്‍ മാത്രമേ നല്‍കുമെന്ന് വ്യക്തമാക്കി.
സഖ്യം ഉണ്ടാകാത്ത സാഹചര്യത്തില്‍ 90 സീറ്റിലും സ്ഥാനാര്‍ഥികളെ പ്രഖ്യാപിക്കുമെന്ന് എ.എ.പി എം.പി സഞ്ജയ് സിങ് അറിയിച്ചു. ഇതിനിടെ, 20 സ്ഥാനാര്‍ഥികളുടെ ആദ്യ പട്ടിക ആം ആദ്മി പാര്‍ട്ടി പ്രഖ്യാപിച്ചു. കെ.സി. വേണുഗോപാലും എ.എ.പി. എം.പി. രാഘവ് ഛദ്ദയും മൂന്നുതവണ ചര്‍ച്ച നടത്തിയെങ്കിലും ഫലമുണ്ടായില്ല. എന്നാല്‍ ചര്‍ച്ചകള്‍ തുടരുന്നുവെന്നാണ് കോണ്‍ഗ്രസ് ദേശീയ നേതൃത്വം സൂചന നല്‍കുന്നത്.
മറ്റൊരു വാര്‍ത്തയില്‍, ഹരിയാന ബിജെപിയില്‍ സ്ഥാനാര്‍ഥി പ്രഖ്യാപനത്തിന് പിന്നാലെ വീണ്ടും പൊട്ടിത്തെറിയുണ്ടായി. പാര്‍ട്ടി ഉപാധ്യക്ഷന്‍ ജി.എല്‍. ശര്‍മ കോണ്‍ഗ്രസില്‍ ചേര്‍ന്നു. അതേസമയം, ജമ്മു കശ്മീരില്‍ പ്രധാനമന്ത്രി നരേന്ദ്ര മോദിയുടെ പ്രചരണം ശനിയാഴ്ച ആരംഭിക്കും. കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ മറ്റന്നാള്‍ അവിടെ പ്രചരണത്തിനെത്തും.
Story Highlights: Congress and AAP fail to form alliance for Haryana assembly elections due to seat-sharing disagreement
