വിഴിഞ്ഞം രാജ്യാന്തര തുറമുഖത്തിന്റെ പ്രവർത്തനം സജീവമാകുന്നു. ആദ്യ ചരക്ക് കപ്പലായ സാൻ ഫെർണാണ്ടോ 10ന് രാത്രി വിഴിഞ്ഞം പുറം കടലിൽ നങ്കൂരമിടും. 11ന് രാവിലെ 9 നും 10 നും ഇടയിൽ കപ്പലിനെ ബെർത്തിലേക്ക് ആനയിക്കും. അന്നു തന്നെ ചരക്കിറക്കൽ ജോലി ആരംഭിക്കും. 1500 മുതൽ 2000 വരെ കണ്ടെയ്നറുകൾ കപ്പലിൽ ഉണ്ടാകുമെന്നാണ് വിവരം.
ആദ്യ മതർഷിപ്പിന് പിന്നാലെ കൂടുതൽ കപ്പലുകൾ വിഴിഞ്ഞത്തേക്ക് എത്തും. സീസ്പാൻ സാന്റോസ്, മാറിൻ അജുർ എന്നീ രണ്ട് ഫീഡർ കപ്പലുകളാണ് അടുത്തതായി എത്തുക. ഇതിൽ ഒരു കപ്പൽ ശനിയാഴ്ച എത്തിയേക്കും. സമീപ വിദേശ രാജ്യങ്ങളിലേക്കുള്ള കണ്ടെയ്നറുകളും സാൻ ഫെർണാണ്ടോയിൽ ഉണ്ടെന്നും, അവ കൊണ്ടുപോകാൻ രണ്ട് ചെറുകപ്പലുകൾ കൂടി അടുത്ത ദിവസങ്ങളിൽ വിഴിഞ്ഞത്ത് എത്തുമെന്നും അറിയുന്നു.
12ന് മുഖ്യമന്ത്രിയും കേന്ദ്ര മന്ത്രിമാരും ചേർന്ന് സ്വീകരണ ചടങ്ങ് നടത്തും. ഇതിനു പിന്നാലെ സാൻ ഫെർണാഡോ കൊളംബോയിലേക്ക് പുറപ്പെടുമെന്നാണ് വിവരം. ഈ സംഭവങ്ങൾ വിഴിഞ്ഞം തുറമുഖത്തിന്റെ പ്രവർത്തന സജ്ജതയും അന്താരാഷ്ട്ര നിലവാരവും വ്യക്തമാക്കുന്നു.
