പ്രധാനമന്ത്രി നരേന്ദ്ര മോദിയും യുഎസ് പ്രസിഡന്റ് ജോ ബൈഡനും തമ്മിലുള്ള കൂടിക്കാഴ്ച ഇപ്പോൾ വാർത്തകളിൽ നിറയുകയാണ്. എന്നാൽ, ഈ കൂടിക്കാഴ്ചയിൽ മോദി നൽകിയ സമ്മാനങ്ങളാണ് ഇപ്പോൾ ഏറെ ശ്രദ്ധ നേടുന്നത്. ബൈഡനും അദ്ദേഹത്തിന്റെ ഭാര്യ ജിൽ ബൈഡനും മോദി നൽകിയ വിശിഷ്ട സമ്മാനങ്ങൾ ചർച്ചാ വിഷയമായിരിക്കുകയാണ്.
ബൈഡന് മോദി സമ്മാനിച്ചത് വെള്ളിയിൽ തീർത്ത കരകൗശല ട്രെയിനാണ്. ‘ഡൽഹി – ഡെലവെയർ’ എന്നും ‘ഇന്ത്യൻ റെയിൽവേ’ എന്നും ആലേഖനം ചെയ്ത ഈ കസ്റ്റമൈസ്ഡ് ട്രെയിൻ മഹാരാഷ്ട്രയിലെ കരകൗശല വിദഗ്ധരാണ് നിർമ്മിച്ചത്. പ്രഥമ വനിത ജിൽ ബൈഡന് കാശ്മീരി പശ്മിന ഷാൾ ആണ് മോദി ഉപഹാരമായി നൽകിയത്.
മൂന്ന് ദിവസത്തെ സന്ദർശനത്തിനായാണ് മോദി യുഎസിൽ എത്തിയത്. ക്വാഡ് ഉച്ചകോടിയിൽ പങ്കെടുക്കുന്ന അദ്ദേഹം നാളെ മുൻ പ്രസിഡന്റ് ഡോണൾഡ് ട്രംപുമായും കൂടിക്കാഴ്ച നടത്തും. ഇന്ത്യ-യുഎസ് പങ്കാളിത്തം ചരിത്രത്തിലെ ഏറ്റവും ശക്തവും ചലനാത്മകവുമാണെന്ന് യുഎസ് പ്രസിഡന്റ് ജോ ബൈഡൻ അഭിപ്രായപ്പെട്ടു.
Story Highlights: Prime Minister Modi gifts President Biden a customized silver train model during their meeting in the US
