അൻവർ പോയാലും ഇടതുമുന്നണിക്ക് ഒന്നും സംഭവിക്കില്ല; മാന്യതയുണ്ടെങ്കിൽ രാജി വയ്ക്കണം: എംഎം മണി

ഇടതുപക്ഷ മുന്നണിയുടെ ഭാഗമായി ജയിച്ചിട്ട് പിന്നിൽ നിന്ന് കുത്തുകയായിരുന്നു അൻവർ എന്ന് എംഎം മണി എംഎൽഎ ആരോപിച്ചു. ഒരു സ്വതന്ത്രൻ പാലിക്കേണ്ട സാമാന്യ മര്യാദ ഈ സർക്കാരിനോട് അൻവർ കാണിച്ചില്ലെന്നും അദ്ദേഹം കുറ്റപ്പെടുത്തി. അൻവർ പോയാലും ഇടതുമുന്നണിക്ക് ഒന്നും സംഭവിക്കാനില്ലെന്നും, മാന്യതയുണ്ടെങ്കിൽ രാജി വയ്ക്കണമെന്നും മണി വ്യക്തമാക്കി.

സാധാരണ പാർട്ടിക്കാരുടെ വികാരങ്ങൾ മുഴുവനും ഉൾക്കൊള്ളുന്നത് അൻവറാണോ എന്ന് മണി ചോദിച്ചു. ഒരു കത്തോ ശുപാർശയോ കൊടുത്താൽ അതെല്ലാം നടക്കണം എന്നൊന്നും നിർബന്ധമില്ലെന്നും, അത് പൊതുപ്രവർത്തകരായ എല്ലാവർക്കും അറിയാവുന്ന കാര്യമാണെന്നും അദ്ദേഹം പറഞ്ഞു. അൻവറിന് തോന്നുന്ന കാര്യങ്ങളെല്ലാം അയാൾ വിളിച്ചുപറയുന്നുണ്ട് എന്നുവെച്ച് മുഖ്യമന്ത്രി അദ്ദേഹത്തിന്റെ ധർമം ചെയ്യാതിരിക്കണോ എന്നും മണി ചോദിച്ചു.

അൻവർ തിരഞ്ഞെടുപ്പിൽ ജയിച്ചത് സ്വതന്ത്രൻ ആയത് കൊണ്ടല്ല, ഇടതുപക്ഷത്തിന് നല്ല സ്വാധീനമുള്ള മണ്ഡലം കൂടിയായതുകൊണ്ടുമാണെന്ന് മണി വ്യക്തമാക്കി. പാർട്ടിയിൽ പിആർ ഏജൻസി ഇല്ലെന്നും, സംസ്ഥാന കമ്മിറ്റിയും പൊളിറ്റ്‌ ബ്യൂറോയും കേന്ദ്ര കമ്മിറ്റിയും ജില്ലാകമ്മിറ്റി മുതൽ ആയിരകണക്കിന് ബ്രാഞ്ച് കമ്മിറ്റികൾ വരെയുണ്ടെന്നും അദ്ദേഹം കൂട്ടിച്ചേർത്തു. രാജ്യത്ത് പ്രവർത്തിക്കുന്ന രാഷ്ട്രീയ പാർട്ടികളിൽ ഏറ്റവും സിസ്റ്റമാറ്റിക്കായി പ്രവർത്തിക്കുന്നത് സിപിഐഎം ആണെന്നും എംഎം മണി അവകാശപ്പെട്ടു.

Story Highlights: MM Mani criticizes PV Anvar for betraying LDF after winning as an independent candidate