ഫോർമുല വൺ ഇതിഹാസം മൈക്കൽ ഷൂമാക്കർ 11 വർഷത്തിനു ശേഷം പൊതുവേദിയിൽ പ്രത്യക്ഷപ്പെട്ടു. 2013-ൽ ഫ്രാൻസിലെ ആൽപ്സ് പർവ്വതനിരകളിൽ സ്കീയിങ് അപകടത്തിൽപ്പെട്ട് ചികിത്സയിലായിരുന്ന ഷൂമാക്കർ, മകൾ ജീന മരിയ ഷൂമാക്കറിന്റെ വിവാഹ ചടങ്ങിലാണ് സാന്നിധ്യമറിയിച്ചത്. അപകടത്തിനു ശേഷം ഈ ജർമ്മൻ താരം ഒരിക്കലും പൊതുഇടത്ത് പ്രത്യക്ഷപ്പെട്ടിരുന്നില്ല. മാധ്യമങ്ങൾക്കോ സുഹൃത്തുക്കൾക്കോ അദ്ദേഹത്തെക്കുറിച്ച് വ്യക്തമായ ധാരണ ഇല്ലായിരുന്നു.
7 തവണ ഫോർമുല 1 റേസിംഗ് ചാമ്പ്യനായ ഷൂമാക്കറിന്റെ റെക്കോർഡ് നേട്ടത്തിനൊപ്പമെത്താൻ ബ്രിട്ടീഷ് താരം ലൂയിസ് ഹാമിൽട്ടന് മാത്രമാണ് സാധിച്ചത്. റേസിംഗ് ലോകത്തെ ഇതിഹാസമായി തിളങ്ങി നിൽക്കുമ്പോഴാണ് ഷൂമാക്കർക്ക് അപകടമുണ്ടാകുന്നത്. ഉറഞ്ഞ മഞ്ഞിലൂടെ തെന്നി നീങ്ങുന്ന സ്കീയിങ്ങിനിടെ ഷൂമാക്കർ ഒരു പാറയിൽ തട്ടി തലയിടിച്ചു വീഴുകയായിരുന്നു. വീഴ്ചയിൽ ഷൂമാക്കറിന്റെ ഹെൽമെറ്റ് രണ്ടായി പിളർന്നു.
അപകടത്തെ തുടർന്ന് ചലനശേഷിയും സംസാര ശേഷിയും നഷ്ടപ്പെട്ടു എന്നല്ലാതെ അദ്ദേഹത്തിന്റെ ആരോഗ്യ പുരോഗതിയെ പറ്റി കൂടുതൽ വിവരങ്ങളൊന്നും കുടുംബം പുറത്തുവിട്ടിരുന്നില്ല. സ്പെയിനിലെ ഒരു ആഡംബര വില്ലയിൽ ആയിരുന്നു ഷുമാക്കറിന്റെ മകളുടെ വിവാഹം. അതിഥികളുടെ ഫോണുകൾ വാങ്ങി വച്ചിരുന്ന സ്വകാര്യ ചടങ്ങിന്റെ ചിത്രങ്ങൾ അതിനാൽ പുറത്ത് വന്നിട്ടില്ല.
Story Highlights: F1 legend Michael Schumacher makes first public appearance in 11 years at daughter’s wedding
