ബീഫ് കടത്ത് ആരോപണം: വയോധികനെ മർദ്ദിച്ച പ്രതികൾക്കെതിരെ കർശന നടപടി

താനെ റെയിൽവെ പൊലീസ് കേസിൽ പുതിയ നടപടികൾ സ്വീകരിച്ചിരിക്കുന്നു. 72 കാരനെ ബീഫ് കടത്തിയെന്ന് ആരോപിച്ച് മർദ്ദിച്ച പ്രതികൾക്കെതിരെ കൂടുതൽ കർശനമായ വകുപ്പുകൾ ചുമത്തിയിരിക്കുകയാണ്. മതവികാരം വ്രണപ്പെടുത്തിയതിനും പിടിച്ചുപറി നടത്തിയതിനും ഉൾപ്പെടെയുള്ള അധിക കുറ്റങ്ങൾ ഇപ്പോൾ പ്രതികൾക്കെതിരെ ചുമത്തിയിട്ടുണ്ട്. നേരത്തെ ജാമ്യത്തിൽ വിട്ട പ്രതികളെ പുതിയ വകുപ്പുകളുടെ അടിസ്ഥാനത്തിൽ വീണ്ടും അറസ്റ്റ് ചെയ്യുമെന്ന് പൊലീസ് വ്യക്തമാക്കി.

ധുലെ സ്വദേശികളായ ആകാശ് അവാദ്, നിതേഷ് അഹിരെ, ജയേഷ് മൊഹിതെ എന്നിവരാണ് കേസിലെ പ്രതികൾ. പൊലീസ് റിക്രൂട്മെൻറിനായി മുംബൈയിലേക്ക് പോകുന്ന വഴിയാണ് ഇവർ ട്രെയിനിൽ വച്ച് വയോധികനെ ആക്രമിച്ചത്. സംഭവം വിവാദമായതോടെയാണ് ഭാരതീയ ന്യായ് സംഹിത സെക്ഷൻ 302, 311 എന്നിവ പ്രകാരം പൊലീസ് പ്രതികൾക്കെതിരെ വീണ്ടും കേസെടുത്തത്. നാലാമത്തെ പ്രതിയെയും തിരിച്ചറിഞ്ഞതായും ഉടൻ അറസ്റ്റ് ചെയ്യുമെന്നും പൊലീസ് അറിയിച്ചു.

ആക്രമണത്തിൽ ഭയന്നുപോയ വയോധികൻ ആദ്യം പരാതിപ്പെട്ടിരുന്നില്ല. എന്നാൽ വീഡിയോ ദൃശ്യങ്ങൾ പ്രചരിച്ചതോടെ ജനരോഷം ഉയർന്നു. തുടർന്നാണ് പൊലീസ് പരാതി എഴുതി വാങ്ങിയത്. ആദ്യം നിസാര വകുപ്പുകൾ മാത്രം ചുമത്തിയത് വിമർശനത്തിന് ഇടയാക്കിയിരുന്നു. ഇപ്പോൾ കൂടുതൽ കർശന നടപടികളിലേക്ക് പൊലീസ് നീങ്ങിയിരിക്കുകയാണ്. സീറ്റ് പങ്കിടാൻ വിസമ്മതിച്ചതാണ് ആക്രമണത്തിന് കാരണമായതെന്നാണ് വയോധികൻ പറഞ്ഞത്.

Story Highlights: Non-bailable charges pressed against 3 men for assaulting elderly man after falsely accusing him of carrying beef