കൊച്ചി മെട്രോ റെയില്‍ ലിമിറ്റഡിന്റെ എം.ഡി സ്ഥാനത്ത് ലോക്‌നാഥ് ബെഹ്റ ഒരു വര്‍ഷം കൂടി തുടരും. കൊച്ചി മെട്രോ റയില്‍ പദ്ധതിയുടെ രണ്ടാം ഘട്ടവും കൊച്ചി വാട്ടര്‍ മെട്രോ പ്രൊജക്ടും നിര്‍ണായക ഘട്ടത്തിലാണെന്ന് ചൂണ്ടിക്കാട്ടി ബെഹ്റ സര്‍ക്കാരിന് കത്ത് നല്‍കിയിരുന്നു. ഇതിനെ തുടര്‍ന്നാണ് സര്‍ക്കാര്‍ കാലാവധി നീട്ടി ഉത്തരവിറക്കിയത്.
2021 ആഗസ്ത് 27-ന് പൊലീസ് മേധാവിയായി വിരമിച്ചതിനു പിന്നാലെയാണ് ലോക്‌നാഥ് ബെഹ്റയെ കൊച്ചി മെട്രോ എം.ഡിയായി സര്‍ക്കാര്‍ നിയമിച്ചത്. മൂന്ന് വര്‍ഷത്തേക്കായിരുന്നു ആദ്യ നിയമനം. 2024 ആഗസ്ത് 29-ന് ബെഹ്റയുടെ കാലാവധി അവസാനിച്ചിരുന്നു. എന്നാല്‍ പദ്ധതികളുടെ നിര്‍ണായക ഘട്ടം പരിഗണിച്ച് ഒരു വര്‍ഷം കൂടി കാലാവധി നീട്ടണമെന്ന് അദ്ദേഹം ആവശ്യപ്പെട്ടു.
ഗതാഗത സെക്രട്ടറി ബെഹ്റയുടെ ആവശ്യം അംഗീകരിച്ച് കാലാവധി നീട്ടി ഉത്തരവിറക്കി. ഇതനുസരിച്ച് 2025 ആഗസ്ത് 29 വരെ ലോക്‌നാഥ് ബെഹ്റ കൊച്ചി മെട്രോ റെയില്‍ ലിമിറ്റഡിന്റെ എം.ഡി ആയി തുടരും. ഇതോടെ കൊച്ചി മെട്രോയുടെയും വാട്ടര്‍ മെട്രോയുടെയും നിര്‍മാണ പ്രവര്‍ത്തനങ്ങള്‍ക്ക് തുടര്‍ച്ച ഉറപ്പാക്കാന്‍ സാധിക്കും.
Story Highlights: Loknath Behra’s tenure as MD of Kochi Metro Rail Limited extended for one year due to ongoing critical projects.
