Little Kites AI-Powered Camps for Differently-Abled Students

ഭിന്നശേഷി വിദ്യാർഥികൾക്ക് പഠനം കൂടുതൽ സുഗമമാക്കാൻ ആർട്ടിഫിഷ്യൽ ഇന്റലിജൻസ് സാങ്കേതികവിദ്യ ഉപയോഗിച്ച് ലിറ്റിൽ കൈറ്റ്സ് പദ്ധതി മുന്നോട്ട്. കേരള ഇൻഫ്രാസ്ട്രക്ചർ ആൻഡ് ടെക്നോളജി ഫോർ എഡ്യൂക്കേഷന്റെ നേതൃത്വത്തിൽ യുണിസെഫിന്റെ സഹായത്തോടെ സംഘടിപ്പിക്കുന്ന ഉപജില്ലാ ക്യാമ്പുകൾ ശനിയാഴ്ച ആരംഭിക്കും. ഈ ക്യാമ്പുകളിൽ ഭിന്നശേഷി വിദ്യാർഥികൾക്കായി എഐ സാങ്കേതികവിദ്യ ഉപയോഗിച്ച് പ്രത്യേക പഠന സഹായികൾ തയ്യാറാക്കും.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

സംസാരിക്കാനും കേൾക്കാനും ബുദ്ധിമുട്ടുള്ള കുട്ടികൾക്കായി ആംഗ്യഭാഷയിൽ സംവദിക്കാൻ സഹായിക്കുന്ന പ്രോഗ്രാമുകളും ക്യാമ്പിൽ വികസിപ്പിക്കും. ഇത് ആംഗ്യഭാഷ പഠിക്കുന്നതിനൊപ്പം ഇത്തരം കുട്ടികളുമായി സംവദിക്കാനുള്ള കഴിവും വളർത്തും. പരിസ്ഥിതി സംരക്ഷണ ബോധവൽക്കരണത്തിനായി ഓപ്പൺടൂൺസ്, ബ്ലെൻഡർ തുടങ്ങിയ സ്വതന്ത്ര സോഫ്റ്റ്വെയറുകൾ ഉപയോഗിച്ച് കുട്ടികൾ തന്നെ അനിമേഷൻ പ്രോഗ്രാമുകൾ നിർമ്മിക്കും.

നഗരവൽക്കരണത്താൽ നശിപ്പിക്കപ്പെട്ട പ്രദേശം രണ്ട് പക്ഷികളുടെ പ്രയത്നത്തിലൂടെ വീണ്ടും ഹരിതാഭമാക്കുന്നതിനെക്കുറിച്ചുള്ള അനിമേഷൻ ചിത്രങ്ങളും കുട്ടികൾ തയ്യാറാക്കും. സ്കൂൾതല ക്യാമ്പുകളിൽ നിന്ന് തെരഞ്ഞെടുക്കപ്പെട്ട 15,668 കുട്ടികൾ ഉപജില്ലാ ക്യാമ്പുകളിൽ പങ്കെടുക്കുമെന്നും, 1200 പരിശീലകരെ ഇതിനായി സജ്ജമാക്കിയതായും കൈറ്റ് സിഇഒ കെ അൻവർ സാദത്ത് അറിയിച്ചു. അധ്യയന ദിവസങ്ങൾ നഷ്ടപ്പെടാത്ത രീതിയിലാണ് ക്യാമ്പുകൾ ക്രമീകരിച്ചിട്ടുള്ളത്.