കുറുവാ സംഘത്തിന്റെ മോഷണ പരമ്പരകൾ ആലപ്പുഴ ജില്ലയിൽ ഭീതി പരത്തുന്നു. തുടർച്ചയായ നാലാം ദിവസമാണ് ജില്ലയുടെ വിവിധ മേഖലകളിൽ മോഷ്ടാക്കൾ എത്തുന്നത്. ഇന്നലെ രാത്രി പുന്നപ്ര തൂക്കുകുളത്ത് മുഖം മറച്ച് ശരീരം നിറയെ എണ്ണ തേച്ച മോഷ്ടാവിനെ കണ്ടു. പ്രദേശവാസിയായ യുവാവ് ഇയാളെ പിടികൂടാൻ ശ്രമിച്ചെങ്കിലും പരാജയപ്പെട്ടു.
കുറുവാ സംഘത്തെ പിടികൂടാൻ പ്രത്യേക അന്വേഷണ സംഘത്തെ നിയോഗിച്ചിരിക്കുകയാണ്. മുനമ്പം ഡിവൈഎസ്പിയുടെ നേതൃത്വത്തിൽ പത്തംഗ സംഘമാണ് അന്വേഷണം നടത്തുന്നത്. റൂറൽ എസ്പി സംശയിക്കുന്ന പ്രദേശങ്ങളിൽ സന്ദർശനം നടത്തി. ആലപ്പുഴയിലും പറവൂരിലും എത്തിയത് ഒരേ സംഘങ്ങൾ ആണോയെന്നും പരിശോധിക്കും.
പുന്നപ്രയിലും മണ്ണഞ്ചേരിയിലും പൊലീസും യുവാക്കളും അടങ്ങിയ ജാഗ്രത സമിതികൾ രൂപീകരിച്ച് രാത്രികാല പരിശോധന ആരംഭിച്ചു. ഇതിനിടെ മോഷ്ടാവെന്ന് സംശയിച്ച തമിഴ്നാട് തെങ്കാശി സ്വദേശിയെ ആലപ്പുഴ സൗത്ത് പോലീസ് കസ്റ്റഡിയിലെടുത്തെങ്കിലും ബന്ധമില്ലെന്ന് ബോധ്യപ്പെട്ടതിനെ തുടർന്ന് വിട്ടയച്ചു. മോഷണ പരമ്പരകൾക്ക് പിന്നിൽ കുറുവാ സംഘമാണെന്നാണ് പോലീസിന്റെ പ്രാഥമിക നിഗമനം.
Story Highlights: Special team deployed to investigate Kuruva Gang thefts in Alappuzha
