കോതമംഗലത്ത് കാട്ടാനയുടെ ആക്രമണത്തില്‍ ദാരുണമായി കൊല്ലപ്പെട്ട എല്‍ദോസിന്റെ കുടുംബത്തിന് അടിയന്തര സഹായമായി 10 ലക്ഷം രൂപ നല്‍കുമെന്ന് ജില്ലാ കളക്ടര്‍ പ്രഖ്യാപിച്ചു. ഇതില്‍ അഞ്ചു ലക്ഷം രൂപയുടെ ചെക്ക് ഇതിനോടകം തന്നെ കുടുംബത്തിന് കൈമാറിയതായി അറിയിച്ചു. കൂടാതെ, എല്‍ദോസിന്റെ സഹോദരിക്ക് സര്‍ക്കാര്‍ ജോലി നല്‍കാന്‍ ശുപാര്‍ശ നല്‍കുമെന്നും കലക്ടര്‍ വ്യക്തമാക്കി.
വന്യജീവി ശല്യത്തില്‍ പ്രതിഷേധിച്ച് എല്‍ദോസിന്റെ മൃതദേഹം മാറ്റാന്‍ അനുവദിക്കാതെ നാട്ടുകാര്‍ നടത്തിയ കടുത്ത പ്രതിഷേധത്തെ തുടര്‍ന്ന് ജില്ലാ കളക്ടറുമായി നടത്തിയ ചര്‍ച്ചയ്ക്ക് ശേഷമാണ് പുലര്‍ച്ചെ പ്രതിഷേധം അവസാനിപ്പിച്ചത്. പ്രദേശത്തെ എട്ട് കിലോമീറ്റര്‍ ട്രെഞ്ചിങ്ങ് ജോലി അടിയന്തരമായി ആരംഭിക്കുമെന്ന് കളക്ടര്‍ ഉറപ്പ് നല്‍കി.
പ്രദേശത്തെ സുരക്ഷാ സംവിധാനങ്ങള്‍ ശക്തിപ്പെടുത്തുന്നതിന്റെ ഭാഗമായി അഞ്ചുദിവസത്തിനുള്ളില്‍ വഴി വിളക്കുകള്‍ പുനഃസ്ഥാപിക്കുമെന്നും, സോളാര്‍ തൂക്കുവേലി സ്ഥാപിക്കാനുള്ള ജോലി 21-ന് പുനരാരംഭിക്കുമെന്നും കളക്ടര്‍ അറിയിച്ചു. 27-ന് നേരിട്ട് വന്ന് ജോലികള്‍ അവലോകനം നടത്തുമെന്നും അദ്ദേഹം വ്യക്തമാക്കി. കൂടാതെ, ആര്‍ആര്‍ടിക്ക് വാഹന സൗകര്യം ഉറപ്പാക്കുമെന്നും, വാഹനത്തിനായി എംഎല്‍എ ഫണ്ട് അനുവദിക്കുമെന്നും, അതുവരെ വാഹനം വാടകയ്ക്കെടുക്കുമെന്നും ചര്‍ച്ചയില്‍ തീരുമാനമായി. ഈ നടപടികളിലൂടെ പ്രദേശത്തെ വന്യജീവി ഭീഷണി നിയന്ത്രിക്കാനും ജനങ്ങളുടെ സുരക്ഷ ഉറപ്പാക്കാനും കഴിയുമെന്ന് അധികൃതര്‍ പ്രതീക്ഷിക്കുന്നു.
Story Highlights: Kothamangalam elephant attack victim’s family to receive 10 lakh rupees as immediate aid
