Kochi Police Officers Arrested for Running Immoral Activities

കൊച്ചിയിലെ ലോഡ്ജ് കേന്ദ്രീകരിച്ച് നടന്ന അനാശാസ്യ പ്രവർത്തനങ്ങളിൽ പൊലീസുകാരുടെ പങ്കാളിത്തം സംബന്ധിച്ച് കൊച്ചി സിറ്റി പൊലീസ് വിശദമായ അന്വേഷണം ആരംഭിച്ചു. അറസ്റ്റിലായ എഎസ്ഐമാരായ ബ്രിജേഷ് ലാലിന്റെയും ടി കെ രമേശന്റെയും സ്വത്തുവിവരങ്ങൾ പരിശോധിക്കുന്നതിനൊപ്പം, കൊച്ചിയിലെ മറ്റ് സ്പാകളുമായി ഇവർക്കുള്ള ബന്ധവും അന്വേഷണ വിധേയമാക്കും. ടി കെ രമേശനും അനാശാസ്യ കേന്ദ്രത്തിലെ നടത്തിപ്പുകാരനുമായി ലക്ഷങ്ങളുടെ സാമ്പത്തിക ഇടപാടുകൾ നടന്നതായി പൊലീസ് കണ്ടെത്തിയിട്ടുണ്ട്.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

ഇന്നലെയാണ് കൊച്ചിയിലെ ലോഡ്ജിൽ നടന്ന അനാശാസ്യ പ്രവർത്തനങ്ങളുമായി ബന്ധപ്പെട്ട് രണ്ട് പൊലീസുകാരെ അറസ്റ്റ് ചെയ്തത്. ട്രാഫിക് ഈസ്റ്റ് പൊലീസ് സ്റ്റേഷനിലെ രമേശും പാലാരിവട്ടം പൊലീസ് സ്റ്റേഷനിലെ ബ്രിജേഷ് ലാലുമാണ് പിടിയിലായത്. കഴിഞ്ഞ ഒക്ടോബറിൽ കടവന്ത്രയിലെ ലോഡ്ജിൽ നടത്തിയ പരിശോധനയിൽ അനാശാസ്യ പ്രവർത്തനങ്ങൾക്ക് ഏജന്റുമാരായി പ്രവർത്തിച്ച ഒരു സ്ത്രീയും പുരുഷനും പിടിയിലായിരുന്നു. തുടർന്നുള്ള അന്വേഷണത്തിലാണ് ലോഡ്ജ് നടത്തി വരുമാനമുണ്ടാക്കിയിരുന്നത് പൊലീസുകാരാണെന്ന് വ്യക്തമായത്.

ഇന്ന് രാവിലെയാണ് ഇരുവരെയും അന്വേഷണ സംഘം കസ്റ്റഡിയിലെടുത്തത്. ഒക്ടോബറിൽ പിടിയിലായ ഏജന്റുമാരെ ചോദ്യം ചെയ്തപ്പോഴാണ് ലോഡ്ജിന്റെ നടത്തിപ്പിൽ പൊലീസുകാർക്ക് ബന്ധമുണ്ടെന്ന സൂചന ലഭിച്ചത്. തുടർന്നുള്ള അന്വേഷണത്തിൽ അനാശാസ്യ കേന്ദ്രത്തിന്റെ നടത്തിപ്പിൽ രമേശിനും ബ്രിജേഷ് ലാലിനും പങ്കുണ്ടെന്നതിന് തെളിവുകൾ ലഭിച്ചു. ഇരുവരെയും കസ്റ്റഡിയിലെടുത്ത് ചോദ്യം ചെയ്തശേഷം വൈകിട്ടോടെയാണ് അറസ്റ്റ് രേഖപ്പെടുത്തിയത്. ഈ സംഭവം കേരളത്തിലെ പൊലീസ് വകുപ്പിന്റെ സത്യസന്ധതയെ ചോദ്യം ചെയ്യുന്നതാണ്, കൂടാതെ നിയമപാലകർ തന്നെ നിയമലംഘനത്തിൽ ഏർപ്പെടുന്നത് സമൂഹത്തിന്റെ സുരക്ഷയെ സംബന്ധിച്ച് ആശങ്ക ഉയർത്തുന്നു.