കൊച്ചിയിലെ ആഡംബര ഹോട്ടലിൽ നടന്ന ലഹരി പാർട്ടിയുമായി ബന്ധപ്പെട്ട കേസിൽ അന്വേഷണം ശക്തമാകുന്നു. ഗുണ്ടാ നേതാവ് ഓം പ്രകാശ് താമസിച്ച മുറിയിൽ ഫോറൻസിക് വിഭാഗം പരിശോധന നടത്തി. ഹോട്ടലിൽ നിന്ന് ലഭിച്ച സിസിടിവി ദൃശ്യങ്ങളും പരിശോധിക്കുന്നുണ്ട്. ഓം പ്രകാശിന്റെ സുഹൃത്തുക്കൾ ഒരുക്കിയ ലഹരി പാർട്ടിയിൽ പങ്കെടുക്കാനാണ് താരങ്ങൾ അടക്കമുള്ളവർ എത്തിയതെന്ന നിഗമനത്തിലാണ് പൊലീസ്.
പ്രയാഗ മാർട്ടിനേയും ശ്രീനാഥ് ഭാസിയേയും ഉൾപ്പെടെ 20 പേരെ ഉടൻ ചോദ്യം ചെയ്യാനാണ് അന്വേഷണ സംഘത്തിന്റെ നീക്കം. സ്റ്റേഷനിൽ ഹാജരാകാൻ ഇരുവർക്കും പൊലീസ് നിർദേശം നൽകിയിട്ടുണ്ട്. സിനിമാ താരങ്ങളെ ഹോട്ടലിൽ എത്തിച്ചത് ഓം പ്രകാശിന്റെ സുഹൃത്ത് എളമക്കര സ്വദേശി ബിനു ജോസഫാണെന്ന് സംശയിക്കുന്നു. ഇയാളെ കസ്റ്റഡിയിലെടുത്ത് സൗത്ത് പൊലീസ് വിശദമായി ചോദ്യം ചെയ്തു.
കഴിഞ്ഞ ദിവസം കൊച്ചി മരട് പൊലീസ് ഓം പ്രകാശിനെ ആഡംബര ഹോട്ടലിൽ നിന്ന് കസ്റ്റഡിയിലെടുത്തിരുന്നു. കേസിൽ കൂടുതൽ അറസ്റ്റുകൾക്ക് സാധ്യതയുണ്ട്. വിശദമായ അന്വേഷണത്തിലേക്ക് കടക്കുകയാണ് പൊലീസ് സംഘം. ലഹരി പാർട്ടിയുമായി ബന്ധപ്പെട്ട് കൂടുതൽ വിവരങ്ങൾ പുറത്തുവരുമെന്നാണ് പ്രതീക്ഷിക്കുന്നത്.
Story Highlights: Police investigate luxury hotel drug party involving Om Prakash and film stars in Kochi
