റേഷൻ വാതിൽപ്പടി വിതരണക്കാർക്ക് കുടിശ്ശിക നാളെ നൽകും; സമരം ഒഴിവാകുമെന്ന് മന്ത്രി

റേഷൻ വാതിൽപ്പടി വിതരണക്കാരുടെ സമര പ്രഖ്യാപനത്തിന് പിന്നാലെ ഭക്ഷ്യവകുപ്പ് അടിയന്തര ഇടപെടൽ നടത്തി. മന്ത്രി ജി.ആർ. അനിൽ പ്രതികരിച്ചത് കുടിശ്ശിക തുക നാളെ തന്നെ വിതരണക്കാർക്ക് നൽകുമെന്നാണ്. മൂന്നു മാസമായി തുക കുടിശ്ശികയായതിനെ തുടർന്നാണ് വിതരണക്കാർ സമരത്തിലേക്ക് പോകാൻ തീരുമാനിച്ചത്. എന്നാൽ ഇനി സമരം ചെയ്യേണ്ടി വരില്ലെന്ന് മന്ത്രി ഉറപ്പു നൽകി.

സംസ്ഥാനത്തെ റേഷൻ കടകളിലേക്ക് സാധനങ്ങൾ എത്തിക്കുന്ന വാതിൽപ്പടി വിതരണക്കാർക്ക് മൂന്നു മാസമായി തുക കുടിശ്ശികയാണ്. ഓണത്തിന് മുൻപ് കുടിശ്ശിക പൂർണമായി നൽകുമെന്ന് ഭക്ഷ്യവകുപ്പ് ഉറപ്പ് നൽകിയിരുന്നെങ്കിലും അത് പാലിക്കപ്പെടാതെ വന്നു. ഇതോടെയാണ് അനിശ്ചിതകാല സമരത്തിലേക്ക് പോകാൻ വിതരണക്കാർ തീരുമാനിച്ചത്. പണം നൽകാമെന്ന് പറഞ്ഞ് സർക്കാർ പറ്റിക്കുകയാണ് ചെയ്തതെന്ന ആരോപണവും ഉയർന്നിരുന്നു.

നിലവിൽ ധനവകുപ്പ് അനുവദിച്ച 50 കോടി രൂപയിൽ നിന്നാണ് കുടിശ്ശിക തുക നൽകുക. എന്നാൽ കുടിശ്ശിക പൂർണമായി തീർക്കാൻ 95 കോടിയോളം രൂപ വേണം. ഇതിനായി മറ്റ് വഴികൾ തേടുകയാണ് സിവിൽ സപ്പ്ളൈസ് വകുപ്പ്. വിതരണക്കാർ സമരത്തിലേക്ക് എന്ന ട്വന്റി ഫോർ വാർത്തയ്ക്ക് പിന്നാലെയാണ് മന്ത്രിയുടെ ഇടപെടൽ ഉണ്ടായത്.

Story Highlights: Minister GR Anil announces immediate payment of dues to ration doorstep distributors, averting planned strike