കനത്ത മഴയെത്തുടർന്ന് കേരളത്തിലെ വടക്കൻ ജില്ലകളിൽ വ്യാപക നാശനഷ്ടം സംഭവിച്ചു. മലപ്പുറം ജില്ലയിൽ 35 വീടുകളും കോഴിക്കോട് 30-ലധികം വീടുകളും ഭാഗികമായി തകർന്നു. മലപ്പുറത്ത് 48 മണിക്കൂറിനുള്ളിൽ 9.9 ഹെക്ടർ കൃഷി നശിച്ചതോടെ 30 ലക്ഷത്തിലേറെ രൂപയുടെ നഷ്ടമുണ്ടായതായി പ്രാഥമിക വിലയിരുത്തൽ സൂചിപ്പിക്കുന്നു.
കോഴിക്കോട് താലൂക്കിൽ അഞ്ച് ദുരിതാശ്വാസ ക്യാംപുകളിലായി 36 പേരെ മാറ്റിപ്പാർപ്പിച്ചു. 39 കുടുംബങ്ങൾ ബന്ധുവീടുകളിലേക്ക് മാറി. ജില്ലയിലെ വിനോദസഞ്ചാര കേന്ദ്രങ്ങളിൽ പ്രവേശന വിലക്കേർപ്പെടുത്തി. കഴിഞ്ഞ 24 മണിക്കൂറിൽ മലപ്പുറം ജില്ലയിൽ ലഭിച്ച ശരാശരി മഴയുടെ അളവ് 88.2 എം.എം ആണ്. 33 അംഗങ്ങളുള്ള എൻ.ഡി.ആർ.എഫ് സംഘം നിലമ്പൂരിൽ ക്യാമ്പ് ചെയ്യുന്നു.
എറണാകുളത്തും വ്യാപക നാശനഷ്ടമുണ്ടായിട്ടുണ്ട്. തിരുവനന്തപുരം, കൊല്ലം ഒഴികെയുള്ള 12 ജില്ലകളിൽ ഇന്നും നാളെയും മഴ മുന്നറിയിപ്പ് നൽകിയിട്ടുണ്ട്. മഴക്കൊപ്പം ഇടിമിന്നലിനും ശക്തമായ കാറ്റിനും സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നൽകി.
