സംസ്ഥാനത്തെ സ്വർണവില സർവകാല റെക്കോർഡിൽ തുടരുകയാണ്. നിലവിൽ സ്വർണം പവന് 58,400 രൂപയിലാണ് വ്യാപാരം നടക്കുന്നത്. ഒരു ഗ്രാം സ്വർണത്തിന് 7,300 രൂപയാണ് വില. കഴിഞ്ഞ വർഷം ഇതേ സമയം സ്വർണം പവന് 45,280 രൂപയായിരുന്നു. ഒറ്റ വർഷം കൊണ്ട് 13,120 രൂപയുടെ വർധനയാണ് ഉണ്ടായത്.
രാജ്യാന്തര വിപണിയിൽ സ്വർണം ഔൺസിന് 2,733 ഡോളറെന്ന നിരക്കിലാണ് വ്യാപാരം നടക്കുന്നത്. പശ്ചിമേഷ്യൻ സംഘർഷങ്ങളും അമേരിക്കൻ ഫെഡറൽ റിസർവ് പലിശ കുറച്ചേക്കുമെന്ന സൂചനയും സ്വർണത്തെ സുരക്ഷിത നിക്ഷേപമായി കാണാൻ കാരണമാകുന്നു. സമീപ ഭാവിയിൽ സ്വർണവില കുറയാനിടയില്ലെന്നാണ് വിദഗ്ധർ അഭിപ്രായപ്പെടുന്നത്.
സംസ്ഥാനത്തെ സ്വർണാഭരണശാലകളിൽ ആളും ആരവവുമില്ലാത്ത അവസ്ഥയാണ്. വിവാഹ ആവശ്യങ്ങൾക്കായി വരുന്നവരെ മാത്രമാണ് കടകളിൽ കാണാനാകുന്നത്. സ്വർണവിലയിലെ ഈ വർധനവ് സാധാരണക്കാരുടെ സ്വർണ വാങ്ങൽ ശേഷിയെ ബാധിച്ചിരിക്കുന്നു.
Story Highlights: Gold price in Kerala reaches all-time high of 58,400 rupees per sovereign
