ചെന്നൈ കവരൈപ്പേട്ടൈയിൽ നടന്ന ട്രെയിൻ അപകടം അട്ടിമറിയാണെന്ന സംശയം ശക്തമാകുന്നു. റെയിൽവേയുടെ ടെക്നിക്കൽ എഞ്ചിനീയറിംഗ് സംഘം നടത്തിയ പരിശോധനയിൽ, അപകടത്തിന് മുൻപ് തന്നെ സിഗ്നൽ സർക്യൂട്ട് ബോക്സ് ആരോ ഇളക്കിയിരുന്നതായി കണ്ടെത്തി. ഇന്റർലോക്കിംഗ് സേഫ്റ്റി സംവിധാനത്തെ അട്ടിമറിക്കാൻ ശ്രമം നടന്നതായും സംശയമുണ്ട്. സിഗ്നൽ ആൻഡ് ടെലിക്കോം, എഞ്ചിനീയറിംഗ് ആൻഡ് ഓപ്പറേഷൻ വിഭാഗം ഉദ്യോഗസ്ഥരാണ് പരിശോധന നടത്തിയത്.
എഗ്മോർ ഡിഎസ്പി രമേഷ്, ചെന്നൈ സെൻട്രൽ ഡിഎസ്പി കർണൻ, സേലം റെയിൽവേ ഡിഎസ്പി പെരിയസ്വാമി എന്നിവരുടെ നേതൃത്വത്തിലാണ് കേസ് അന്വേഷിക്കുന്നത്. അട്ടിമറിയാണോ എന്ന സംശയത്തിൽ എൻഐഎ കൂടുതൽ പരിശോധനകൾ നടത്തും. ദക്ഷിണ റെയിൽവേ സേഫ്റ്റി കമ്മീഷണർ ഇ എം ചൗധരി അപകട സ്ഥലത്തെത്തി പരിശോധന നടത്തിയിരുന്നു.
വെള്ളിയാഴ്ച രാത്രിയാണ് അപകടം നടന്നത്. ദർഭാങ്ക ഭാഗ്മതി എക്സ്പ്രസ് ലൂപ്പ് ലൈനിലേക്ക് മാറി ഗുഡ്സ് ട്രെയിനുമായി കൂട്ടിയിടിക്കുകയായിരുന്നു. അപകടത്തിൽ 19 പേർക്ക് പരിക്കേറ്റു, നാലുപേർക്ക് സാരമായ പരിക്കുണ്ട്. സിഗ്നലിംഗ് സംവിധാനത്തിലെ പിഴവാണോ അതോ പൈലറ്റിന്റെ അശ്രദ്ധയാണോ അപകടകാരണം എന്നാണ് പ്രധാനമായും പരിശോധിക്കുന്നത്.
Story Highlights: Investigation launched into suspected sabotage of Kavaraipettai train accident, focusing on signal circuit box tampering and safety system breach.
