Kannur Valapattanam robbery: New evidence reveals prior visit

കണ്ണൂർ വളപട്ടണത്തെ വീട്ടിൽ നടന്ന വൻ കവർച്ചയുടെ കൂടുതൽ വിവരങ്ങൾ പുറത്തുവന്നിരിക്കുകയാണ്. മോഷണം നടന്ന വീട്ടിന്റെ സിസിടിവി ദൃശ്യങ്ങൾ പരിശോധിച്ചപ്പോൾ, തലേദിവസവും മോഷ്ടാക്കൾ വീട്ടിലേക്ക് കടക്കാൻ ശ്രമിച്ചതായി കണ്ടെത്തി. ഇതോടെ, തുടർച്ചയായി വീട്ടിൽ ആളുണ്ടാവില്ലെന്ന് അറിയാവുന്നവരാണ് കവർച്ച നടത്തിയതെന്ന സംശയം ശക്തമായി. വീട്ടുകാരെ നേരിട്ടറിയുന്നവർ തന്നെയാണ് കവർച്ച നടത്തിയതെന്ന നിഗമനത്തിലാണ് പൊലീസ്.

വാർത്തകൾ കൂടുതൽ സുതാര്യമായി വാട്സ് ആപ്പിൽ ലഭിക്കുവാൻ : Click here

ചുറ്റുമതിലിൽ നിന്ന് വീട്ടിലേക്ക് കടക്കാൻ ശ്രമിക്കുന്നതിനിടെ കവർച്ചക്കാർ തകർത്ത ജനലരികിൽ പതിഞ്ഞ വിരലടയാളങ്ങൾ ഫോറൻസിക് ശേഖരിച്ചു. വീടിനുള്ളിൽ നിന്ന് ലഭിച്ച ഒരു ഉളിയിൽ നിന്നും ചില വിരലടയാളങ്ങൾ കണ്ടെത്തി. ഫോൺ കോളുകൾ കേന്ദ്രീകരിച്ചുള്ള അന്വേഷണങ്ങളും നടക്കുന്നുണ്ട്. വീട്ടുടമയായ അഷറഫുമായി അടുപ്പമുള്ളവർ, ജീവനക്കാർ, അയൽവാസികൾ എന്നിവരുടെ ഫോൺ കോളുകൾ പരിശോധിക്കും.

പ്രതികൾ സംസ്ഥാനം വിട്ടേക്കുമെന്ന സംശയത്തെ തുടർന്ന് അന്യസംസ്ഥാനങ്ങൾ കേന്ദ്രീകരിച്ചും അന്വേഷണം നടക്കുന്നു. അന്വേഷണസംഘത്തിന്റെ വിലയിരുത്തൽ പ്രകാരം, ഇത് മുൻകൂട്ടി പദ്ധതി തയ്യാറാക്കിയുള്ള ആസൂത്രിത കവർച്ചയാണ്. 300 പവന്റെ ആഭരണങ്ങളും ഒരു കോടി രൂപയുമാണ് അഷറഫിന്റെ വീട്ടിൽ നിന്ന് കവർച്ച ചെയ്യപ്പെട്ടത്. പ്രധാനമായും അന്വേഷണം സിസിടിവി ദൃശ്യങ്ങൾ കേന്ദ്രീകരിച്ചാണ് നടക്കുന്നത്.