കളിയിക്കാവിളയിലെ ക്വാറി ഉടമയുടെ കൊലപാതകത്തിന് പിന്നിൽ അമ്പിളി എന്ന സജികുമാർ തന്നെയാണെന്ന് പൊലീസ് സ്ഥിരീകരിച്ചു. പണത്തിനു വേണ്ടിയായിരുന്നു ഈ കൊലപാതകമെന്നാണ് അന്വേഷണത്തിൽ വ്യക്തമായത്. രണ്ടാം പ്രതിയായ സുനിൽകുമാർ ക്ലോറോഫോമും സർജിക്കൽ ബ്ലേഡും അമ്പിളിക്ക് നൽകിയെങ്കിലും കൊലപാതകത്തെക്കുറിച്ച് അറിഞ്ഞിരുന്നില്ലെന്ന് മൊഴി നൽകി. മൂന്നാം പ്രതിയായ പ്രദീപ് ചന്ദ്രൻ നേരിട്ട് ഇടപെട്ടിട്ടില്ലെന്നും, അമ്പിളിയും സുനിൽകുമാറും സംസാരിക്കുമ്പോൾ ഒപ്പമുണ്ടായിരുന്നതിനാലാണ് ഗൂഢാലോചന വകുപ്പ് പ്രകാരം കേസെടുത്തതെന്നും പൊലീസ് വ്യക്തമാക്കി.
കൊല്ലപ്പെട്ട ക്വാറി ഉടമ ദീപുവിന്റെ പണം തട്ടിയെടുക്കാനായിരുന്നു കൊലപാതകമെന്ന് കണ്ടെത്തി. വലിയ ആസൂത്രണത്തോടെയാണ് അമ്പിളി കൊലപാതകം നടത്തിയത്. പിടിക്കപ്പെട്ടാൽ പറയാനുള്ള കള്ളങ്ങളും നേരത്തെ തയ്യാറാക്കിവച്ചിരുന്നു. ഇൻഷുറൻസ് ബന്ധവും, മറ്റൊരാൾ നൽകിയ ക്വട്ടേഷനും എല്ലാം അമ്പിളിയുടെ കള്ളക്കഥകളായിരുന്നു. കേരള-തമിഴ്നാട് അതിർത്തിയായ കളിയിക്കാവിള ഒറ്റാമരത്ത് വച്ചാണ് ദീപുവിനെ കഴുത്തറുത്ത് കൊലപ്പെടുത്തിയത്. കന്യാകുമാരി എസ്.പി സുന്ദര വദനത്തിന്റെ നേതൃത്വത്തിലുള്ള പ്രത്യേക സംഘമാണ് കേസന്വേഷിച്ചത്.
