കെപിസിസി ക്യാമ്പിൽ നേതാക്കളെ വിമർശിച്ചിട്ടില്ല; വാർത്തകൾ തെറ്റെന്ന് സുധാകരൻ

കേരള പ്രദേശ് കോൺഗ്രസ് കമ്മിറ്റി (കെപിസിസി) പ്രസിഡന്റ് കെ. സുധാകരൻ എംപി, വയനാട് സുൽത്താൻബത്തേരിയിൽ നടന്ന കെപിസിസി ക്യാമ്പ് എക്സിക്യൂട്ടീവിനെക്കുറിച്ച് പ്രതികരിച്ചു. ഏതെങ്കിലും നേതാവിനെ വ്യക്തിപരമായി വിമർശിക്കുന്ന തരത്തിലുള്ള പരാമർശങ്ങൾ ഉണ്ടായിട്ടില്ലെന്ന് അദ്ദേഹം വ്യക്തമാക്കി. പഞ്ചായത്ത്, നിയമസഭാ തെരഞ്ഞെടുപ്പുകളിലേക്ക് സംഘടനയെ ശക്തിപ്പെടുത്തുന്നതിനുള്ള ക്രിയാത്മക ചർച്ചകളും നിർദ്ദേശങ്ങളുമാണ് നടന്നതെന്നും അദ്ദേഹം പറഞ്ഞു.

കെ. മുരളീധരനെ ചിലർ വിമർശിച്ചതായി ചില മാധ്യമങ്ങൾ റിപ്പോർട്ട് ചെയ്തത് തെറ്റാണെന്ന് സുധാകരൻ ചൂണ്ടിക്കാട്ടി. ഈ വാർത്ത പൂർണ്ണമായും അടിസ്ഥാനരഹിതവും അസംബന്ധവുമാണെന്ന് അദ്ദേഹം വ്യക്തമാക്കി. കേരളത്തിലെ കോൺഗ്രസിന് പുതിയ ഉണർവ്വും ദിശാബോധവും നൽകുന്ന ചർച്ചകളാണ് നടന്നതെന്നും, കോൺഗ്രസിന്റെ ചരിത്രത്തിലാദ്യമായി സംഘടനാ ചർച്ചകൾ പുറത്തുവരാതെ നടത്തിയ സമ്മേളനമാണിതെന്നും അദ്ദേഹം പറഞ്ഞു.

സത്യത്തിന്റെ കണികപോലുമില്ലാത്ത ഈ വാർത്ത പ്രവർത്തകരെയും പൊതുജനങ്ങളെയും തെറ്റിധരിപ്പിക്കുന്നതാണെന്ന് സുധാകരൻ കുറ്റപ്പെടുത്തി. കെപിസിസി ക്യാമ്പ് എക്സിക്യൂട്ടിവിന്റെ മഹത്വവും പ്രസക്തിയും തകർക്കാനുള്ള ബോധപൂർവ്വമായ ശ്രമമായാണ് ഈ വാർത്തയെ കാണുന്നതെന്നും അദ്ദേഹം പറഞ്ഞു. മാധ്യമങ്ങൾ വാർത്തകളുടെ ഉറവിടം പരിശോധിക്കണമെന്നും, തെറ്റുതിരുത്താൻ തയ്യാറാകണമെന്നും സുധാകരൻ ആവശ്യപ്പെട്ടു.