ഇസ്‍ലാമിനെ മതഭീകരവാദത്തിന്റെയും, മൗലികവാദത്തിന്റെയും ഒരേയൊരു രൂപമായി പരിചയപ്പെടുത്തി ജവഹർലാൽ നെഹ്‌റു സർവകലാശാലയുടെ പുതിയ കോഴ്‌സ്. ഇസ്‍ലാമിക രാജ്യങ്ങളെ സ്വാധീനിച്ച ഭീകരവാദത്തിന്റെ ഭരണകൂട പിന്തുണക്കാരായിരുന്നു പഴയ സോവിയറ്റ് യൂനിയനും ചൈനയുമെന്ന് കോഴ്‌സിൽ പറയുന്നു.
Counter Terrorism, Asymmetric Conflicts and Strategies for Cooperation among Major Powers എന്ന തലക്കെട്ടിലുള്ള ഇരട്ട ഡിഗ്രി പ്രോഗ്രാമിന്റെ ഭാഗമായുള്ള കോഴ്‌സിലാണ് വിവാദ പരാമർശങ്ങൾ ഉൾപ്പെട്ടിട്ടുള്ളത്. എൻജിനീയറിങ്ങിൽ ബി.ടെക്ക് കഴിഞ്ഞ് ഇന്റർനാഷനൽ റിലേഷൻസിൽ സ്‌പെഷലൈസേഷനോടെ എംഎസ് ചെയ്യുന്നവർക്കായി രൂപകൽപ്പന ചെയ്ത ഐച്ഛിക കോഴ്‌സാണിത്. ഈ മാസം 17ന് സർവകലാശാല അക്കാദമിക് കൗൺസിൽ പുതിയ കോഴ്‌സിന് അംഗീകാരം നൽകി.
21-ാം നൂറ്റാണ്ടിന്റെ തുടക്കത്തിൽ ലോകത്ത് ഭീകരാക്രമണങ്ങളുടെ വ്യാപനത്തിൽ മതപ്രചോദിതമായ ഭീകരവാദത്തിന് വലിയ പങ്കാണുള്ളത്. ഖുർആന്റെ വികലമായ വ്യാഖ്യാനങ്ങളാണ് ആത്മാഹുതിയിലൂടെയും ചാവേർ ആക്രമണത്തിലൂടെയുമുള്ള ജിഹാദി അക്രമങ്ങളുടെ അതിവ്യാപനത്തിന് ഇടയാക്കിയത്.
സൈബർരംഗം ചൂഷണം ചെയ്ത് തീവ്ര ഇസ്‍ലാമിക മതപണ്ഡിതർ ഇലക്ട്രോണിക് രംഗത്തും ലോകവ്യാപകമായി ജിഹാദി ഭീകരവാദം പ്രചരിപ്പിക്കുകയാണ്. അക്രമങ്ങളും ഹിംസകളും മതേതരമായ ഇസ്‍ലാമേതര സമൂഹങ്ങളിലടക്കം വ്യാപിക്കാൻ സൈബർരംഗത്തെ ഭീകരവാദ പ്രചാരണം കാരണമായിട്ടുണ്ടെന്നും കോഴ്‌സിന് നൽകിയ പാഠപുസ്തകത്തിൽ വ്യക്തമാക്കിയിരിക്കുന്നു.
കനേഡിയൻ, യുഎസ്, ലാറ്റിനമേരിക്കൻ തുടങ്ങിയ പഠനകേന്ദ്രങ്ങളുടെ ചെയർപേഴ്‌സണായ അരവിന്ദ് കുമാറാണ് വിവാദ കോഴ്‌സ് തയ്യാറാക്കിയിരിക്കുന്നത്.
Story highlight : JNU’s new course introducing Islam in a distorted way.
