ജാർഖണ്ഡിലെ ഖുന്തി ജില്ലയിൽ നടന്ന ഞെട്ടിക്കുന്ന കൊലപാതകം പുറത്തുവന്നു. 25 വയസ്സുള്ള ഇറച്ചിവെട്ടുകാരനായ നരേഷ് ഭെന്ഗ്ര തന്റെ പങ്കാളിയെ വനപ്രദേശത്ത് വെച്ച് കഴുത്ത് ഞെരിച്ച് കൊലപ്പെടുത്തുകയും, ശരീരം 40 മുതൽ 50 വരെ കഷണങ്ങളാക്കുകയും ചെയ്തതായി പൊലീസ് വ്യക്തമാക്കി.
നവംബർ 24-ന് ജരിയഗഡ് പൊലീസ് സ്റ്റേഷൻ പരിധിയിലെ ജോർദാഗ് ഗ്രാമത്തിന് സമീപം മനുഷ്യ ശരീരഭാഗം കടിച്ചുപിടിച്ച നിലയിൽ തെരുവ് നായയെ കണ്ടതോടെയാണ് സംഭവം പുറത്തറിഞ്ഞത്. അന്വേഷണത്തിൽ, കൊലപാതകം നടന്ന് രണ്ടാഴ്ച കഴിഞ്ഞിരുന്നുവെന്ന് വ്യക്തമായി. കൊല്ലപ്പെട്ടത് തമിഴ്നാട്ടിൽ നിന്നുള്ള 24 വയസ്സുകാരിയായിരുന്നു. കഴിഞ്ഞ രണ്ട് വർഷമായി ഇവർ ലിവ് ഇൻ ബന്ധത്തിലായിരുന്നു.
പ്രതിയായ നരേഷ് ഭെന്ഗ്ര കുറച്ചുകാലം മുമ്പ് ജാർഖണ്ഡിലേക്ക് മടങ്ങിയിരുന്നു. തന്റെ പങ്കാളിയോട് പറയാതെ മറ്റൊരു സ്ത്രീയെ വിവാഹം കഴിച്ചു. പിന്നീട് ഭാര്യയെ കൂട്ടാതെ തമിഴ്നാട്ടിലേക്ക് മടങ്ങി. നവംബർ എട്ടിന് യുവതിയെയും കൂട്ടി തമിഴ്നാട്ടിൽ നിന്ന് ജാർഖണ്ഡിലെത്തിയ ശേഷമാണ് കൊലപാതകം നടന്നത്. തമിഴ്നാട്ടിലെ ഒരു ഇറച്ചിക്കടയിൽ ജോലി ചെയ്തിരുന്ന ഇയാൾ, തന്റെ തൊഴിൽ പരിചയം ഉപയോഗിച്ച് കൊടൂരമായ രീതിയിൽ മൃതദേഹം വികൃതമാക്കിയതായി പൊലീസ് സംശയിക്കുന്നു.
Story Highlights: Man kills live-in partner, chops body into 40-50 pieces in Jharkhand forest
