യുഎസിലെ ഒരു കൊലപാതകക്കേസിൽ ഇന്ത്യൻ വംശജനായ 52 വയസ്സുകാരൻ ബോബി സിങ് ഷാ അറസ്റ്റിലായി. 21 വയസ്സുകാരിയായ നേപ്പാൾ സ്വദേശിനി മുന പാണ്ഡെയെ കൊലപ്പെടുത്തിയ സംഭവത്തിലാണ് അറസ്റ്റ്. നഴ്സിംഗ് വിദ്യാർത്ഥിനിയായിരുന്ന യുവതിയുടെ ഫ്ലാറ്റിൽ മോഷണം നടക്കുന്നതിനിടെയായിരുന്നു കൊലപാതകം സംഭവിച്ചത്.
തിങ്കളാഴ്ച വൈകിട്ടാണ് യുവതിയെ വെടിയേറ്റ് മരിച്ച നിലയിൽ ഫ്ലാറ്റിനുള്ളിൽ കണ്ടെത്തിയത്. അപ്പാർട്മെന്റിൽ മൃതദേഹം ഉണ്ടെന്ന് ഒരു അപരിചിതൻ വിളിച്ചു പറഞ്ഞതനുസരിച്ച് മുറിയിലെത്തിയ അപ്പാർട്മെന്റ് കോംപ്ലക്സ് ജീവനക്കാരാണ് യുവതിയുടെ മൃതദേഹം ആദ്യം കണ്ടത്. തുടർന്ന് നടത്തിയ അന്വേഷണത്തിൽ സിസിടിവി ദൃശ്യങ്ങൾ പരിശോധിച്ചാണ് പ്രതിയെ കണ്ടെത്തിയത്.
പൊലീസ് അന്വേഷണത്തിൽ, യുവതിയുടെ ഫ്ലാറ്റിൽ മോഷണത്തിനെത്തിയതായിരുന്നു പ്രതിയെന്ന് വ്യക്തമായി. ഇതിനിടെ യുവതിയെ വെടിവെച്ചു വീഴ്ത്തി ഇയാൾ സ്ഥലത്ത് നിന്നും രക്ഷപെടുകയായിരുന്നു. പ്രതിക്കെതിരെ പൊലീസ് കൊലക്കുറ്റം ചുമത്തിയിട്ടുണ്ട്.
Story Highlights: Indian-origin man arrested for murder of Nepali nursing student in US during robbery attempt
