കേന്ദ്രസർക്കാർ അടുത്തവർഷം മുതൽ ജനസംഖ്യ നിർണയത്തിനായുള്ള സെൻസസ് നടപടികൾ ആരംഭിച്ചേക്കുമെന്ന് റിപ്പോർട്ടുകൾ പുറത്തുവരുന്നു. കേന്ദ്ര ആഭ്യന്തര മന്ത്രി അമിത് ഷാ സെൻസസ് ഉചിതമായ സമയത്ത് നടക്കുമെന്ന് പ്രഖ്യാപിച്ചതിന് പിന്നാലെയാണ് ഇതുമായി ബന്ധപ്പെട്ട നീക്കങ്ങൾ ആരംഭിച്ചത്. 2021-ൽ നടത്തേണ്ടിയിരുന്ന സെൻസസ് നാലു വർഷം വൈകിയാണ് നടപടികൾ തുടങ്ങുന്നത്. ഇതിനായുള്ള വിവരശേഖരണത്തിനുള്ള തയ്യാറെടുപ്പുകൾ പൂർത്തിയായിട്ടുണ്ട്.
മൊബൈൽ ആപ്പ് വഴി പൂർണമായും ഡിജിറ്റൽ രീതിയിലായിരിക്കും ഇത്തവണത്തെ സെൻസസ് നടപടികൾ. രജിസ്ട്രാർ ജനറലും ഇന്ത്യൻ സെൻസസ് കമ്മീഷണറുമായ മൃത്യുഞ്ജയ് കുമാർ നാരായണിന്റെ ഡെപ്യുട്ടേഷൻ കാലാവധി അടുത്തിടെ കേന്ദ്രസർക്കാർ നീട്ടിയിരുന്നു. 2026 ഓടെ സെൻസസ് നടപടികൾ പൂർത്തിയാക്കി ലോക്സഭാ മണ്ഡല പുനർനിർണയത്തിലേക്ക് കടക്കുമെന്നും 2028 ഓടെ മണ്ഡലം പുനർനിർണയം പൂർത്തിയാക്കാനും നീക്കമുണ്ട്.
2011-ലായിരുന്നു അവസാനമായി സെൻസസ് നടത്തിയത്. അന്ന് 121 കോടിയിലധികം ജനസംഖ്യയാണ് രേഖപ്പെടുത്തിയത്, ഇത് 17.7 ശതമാനം വളർച്ചാ നിരക്ക് പ്രതിഫലിപ്പിക്കുന്നതാണ്. പ്രതിപക്ഷം ആവശ്യപ്പെടുന്ന ജാതി സെൻസസ് നടത്തിയേക്കില്ലെന്നും വിവരമുണ്ട്. സെൻസസുമായി ബന്ധപ്പെട്ട കേന്ദ്രസർക്കാരിന്റെ ഔദ്യോഗിക പ്രഖ്യാപനം ഉടൻ ഉണ്ടായേക്കും.
Story Highlights: The Indian government is set to begin census operations from next year, with plans to complete by 2026 and conduct constituency delimitation by 2028.
